দেশত প্ৰথমবাৰৰ বাবে ২০২৭ চনত ডিজিটেল মাধ্যমত আৰম্ভ হ’ব লোকপিয়ল (Census)। ইয়াৰ অংশ হিচাপে অহা ২ আগষ্টৰ পৰা ১৬ আগষ্টলৈ কাৰ্বি আংলং (Karbi Anglong) জিলাতো আৰম্ভ হ’ব স্ব-গণনা প্ৰক্ৰিয়া (Self-counting process)। এই সন্দৰ্ভত জিলা আয়ুক্ত আৰণ্যক শইকীয়াই শুকুৰবাৰে ডিফুত এক সংবাদমেল আয়োজন কৰি ইয়াৰ প্ৰক্ৰিয়া আৰু গুৰুত্বপূৰ্ণ সম্পৰ্কে সাংবাদিকসকলক অবগত কৰে।
জিলা আয়ুক্তই জনোৱা অনুসৰি, স্ব-গণনা প্ৰক্ৰিয়াৰ প্ৰথম পৰ্যায়ত কোনো নাগৰিকে Googleৰ পৰা SE.SENSUS.gov.in পৰ্টেল ডাউনলোড কৰিব লাগিব। এই পৰ্টেলত ঘৰৰ মুৰব্বীগৰাকীয়ে নিৰ্দিষ্ট প্ৰক্ৰিয়াৰ জৰিয়তে ঘৰৰ সদস্যসকলৰ তথ্যসমূহ শুদ্ধকৈ পূৰণ কৰিব লাগিব। ইয়াৰ পিছত ঘৰৰ মুৰব্বীগৰাকীক এটা ID দিয়া হ’ব আৰু এই IDটো পৰবৰ্তী সময়ত ঘৰৰ নম্বৰ দিয়াৰ সময়ত প্ৰয়োজন হ’ব।
আনহাতে, অহা ১৭ আগষ্টৰ পৰা ১৫ ছেপ্টেম্বৰলৈ জিলাখনত গণনাকাৰীসকল ঘৰে ঘৰে গৈ উপস্থিত হ’ব বুলি তেওঁ উল্লেখ কৰে।
আনহাতে, লোকপিয়লৰ কাম সফলতাৰে পৰিচালনাৰ বাবে জিলাখনত মুঠ ১৯ টা চাৰ্জ কাৰ্য্যালয় স্থাপন কৰা হৈছে। ইয়াৰে ভিতৰত নাগৰিকৰ সুবিধাৰ বাবে গ্ৰামীণ আৰু নগৰীয়া চাৰ্জ কাৰ্য্যালয়ৰ ব্যৱস্থা কৰা হৈছে। ইফালে গণনা প্ৰক্ৰিয়াত অংশগ্ৰহণৰ বাবে জিলাখনত ১,৭১২ গৰাকী গণনাকাৰী আৰু ২৮৩ গৰাকী তত্ত্বাৱধায়ক নিযুক্তি দিয়া হৈছে। ইয়াৰ উপৰি জিলাখনত নিৰাপত্তা বাহিনীৰ বাবে ৪ টা চাৰ্জ কাৰ্য্যালয়ৰ ব্যৱস্থা কৰা বুলিও জিলা আয়ুক্তই জানিবলৈ দিয়ে।
উল্লেখযোগ্য যে স্ব-গণনাৰ সময়ত কোনোধৰণৰ কাকত আপলোড কৰিব নালাগে বুলি আয়ুক্তগৰাকীয়ে উল্লেখ কৰাৰ লগতে স্বচ্ছ, সঠিক আৰু নিৰ্ভুল লোকপিয়ল সম্পন্ন কৰাৰ ক্ষেত্ৰত সকলো নাগৰিকক আন্তৰিকতাৰে গণনা প্ৰক্ৰিয়াত সহযোগ কৰিবলৈ আহ্বান জনাইছে।
