সোমবাৰৰ পৰা আৰম্ভ হৈছে কাৰ্বি আংলং স্বায়ত্তশাসিত পৰিষদ (Karbi Anglong Autonomous Council)ৰ ২০২৬-২৭ বৰ্ষৰ বাজেট অধিৱেশন (Budget Session)। ছেছন হলত দুদিনীয়া কাৰ্যসূচীৰে জিলা বাজেট আৰু পৰিষদৰ অন্তৰ্গত বিষয়ৰ বাজেট অধিৱেশন অনুষ্ঠিত হৈছে।
অধ্যক্ষ ৰাজু টিচ’ৰ অধ্যক্ষতাত অনুষ্ঠিত বাজেট অধিৱেশনত মুখ্য কাৰ্যবাহী সদস্য তথা বিত্ত বিভাগৰ দায়িত্বত থকা ডঃ তুলিৰাম ৰংহাঙে (Tuliram Ronghang) ২০২৬-২৭ বিত্তীয় বৰ্ষৰ বাবে ১,০০৬ কোটি টকাৰ জিলা বাজেট আৰু ৬০০ কোটিৰো অধিক টকাৰ পৰিষদীয় বাজেট উত্থাপন কৰে। ইয়াৰ পিছত বাজেটৰ ওপৰত সদনত হোৱা আলোচনাৰ অন্তত ইয়াক গৃহীত কৰাৰ বাবে দাখিল কৰে ।
আনহাতে, বাজেট ভাষণত মুখ্য কাৰ্যবাহী সদস্য তুলিৰাম ৰংহাঙে এই বাজেটত জিলাখনৰ জনসাধাৰণৰ আশা-আকাংক্ষা প্ৰতিফলিত হোৱা বুলি উল্লেখ কৰি জিলাখনৰ সৰ্বাংগীণ উন্নয়নত গুৰুত্ব দিয়া বুলি কয়।
উল্লেখ্য যে বাজেটত যুৱ প্ৰজন্মক ফুটবলৰ প্ৰতি আকৰ্ষিত কৰাৰ বাবে ফুটবল একাডেমীৰ বাবে ১ কোটি, কাৰ্বি কালচাৰেল ছ’চাইটীৰ বাবে ১ কোটি, কাৰ্বি লামমেত আমেইৰ বাবে ১ কোটি টকা ধাৰ্য কৰা হৈছে। ইয়াৰ উপৰি জিলাখনত বসবাস কৰা বিভিন্ন জনগোষ্ঠীৰ স্বকীয় কলা-সংস্কৃতিৰ সংৰক্ষণ আৰু সম্প্ৰচাৰৰ বাবেও বিশেষ পুঁজি ধাৰ্য কৰা হৈছে। আনহাতে, কাৰিকৰী শিক্ষাৰ ছাত্ৰ-ছাত্ৰীক বৃত্তি প্ৰদানৰ বাবে ৫ কোটি টকাৰ বাজেট নিৰ্ধাৰণ কৰা হৈছে।
