সোণৰ পদকেই এতিয়া একমাত্ৰ লক্ষ্য : অলিম্পিকত পদক নিশ্চিত কৰাৰ পিছত লাভলীনাৰ প্ৰতিক্ৰিয়া

স্পৰ্টছ ডেস্ক

শুক্রবাৰে চীনা টাইপেইৰ চেন নিয়েন-চিনক ৪-১ ব্যৱধানত পৰাস্ত কৰে লাভলীনাই। কোৱার্টাৰ ফাইনেলত জয়ী হৈ পদক নিশ্চিত কৰিলে তেওঁ। ছেমি ফাইনেলত প্ৰৱেশ কৰি লাভলীনাই কয়, ‘‘কোৱার্টাৰ ফাইনেলত জয়ী হৈ আত্মবিশ্বাস বাঢ়িছে। এইবাৰ ছেমি ফাইনেলত জয়ী হোৱাই লক্ষ্য। চেষ্টা কৰিম আৰু ভাল খেলিবলৈ। ভাৰতৰ বাবে সোণৰ পদক জয়ী কৰিব বিচাৰোঁ। সেইটোৱে মোৰ প্ৰকৃত লক্ষ্য।’’

জ্যোতি প্ৰসাদে লিখিছিল
লুইতৰ ঘাটেৰে গাঁৱলীয়া বাটেৰে
পৃথিৱী চাবলে’ ওলালি কোন?
গাঁৱৰে সোণ, তয়ে হ’বি দেশৰে জিলিকা জোন!

সঁচাকৈয়ে লুইতৰ পাৰৰ গাঁৱৰ সোণ লাভলীনা এতিয়া দেশৰ জিলিকা জোন৷ সমগ্ৰ দেশৰ লগতে অসমবাসীক গৌৰৱান্বিত কৰি লাভলীনা বৰগোঁহাই এতিয়া দেশৰ ‘স্পৰ্টছ আইকন’৷ অলিম্পিকৰ ৬৯ কেজি শাখাত চীনা টাইপেৰ প্ৰতিদ্বন্দ্বীগৰাকীক পৰাস্ত কৰি
ভাৰতৰ অলিম্পিক বক্সিঙৰ ইতিহাসত তৃতীয়টো পদক নিশ্চিত কৰে তেওঁ। লাভলীনাই ওৱেল্টাৰৱেইট শাখাত দেশক পদক আনি দিলে। ব্রঞ্জ পদক এতিয়া তেওঁৰ নামত নিশ্চিত। মেৰি কমৰ পিছত দ্বিতীয়গৰাকী ভাৰতীয় আৰু প্ৰথমগৰাকী অসমীয়া মহিলা বক্সাৰ হিচাবে ভাৰতক পদক দিলে লাভলীনাই। উল্লেখ্য যে বক্সিঙত ভাৰতে প্রথমটো পদক পাইছিল বীজেন্দ্ৰ সিঙৰ জৰিয়তে। তাৰ পিছত সুদীৰ্ঘ ৯ বছৰ পিছত পুনৰ দেশলৈ বক্সিং পদক আহিছে।

২০০৮ চনৰ ২০ আগষ্টত বেইজিং অলিম্পিকত ব্রঞ্জ জয় কৰিছিল বীজেন্দ্রই। মিডলৱেইট শাখাত তেওঁ প্ৰতিদ্বন্দিতা আগবঢ়াইছিল। তাৰ চাৰি বছৰ পিছত অলিম্পিক বক্সিঙত দ্বিতীয়টো পদক জয় কৰিছিল ভাৰতে, সেইটোও আছিল ব্রঞ্জৰে পদক। উক্ত পদক জয় কৰিছিল কিংবদন্তি বক্সাৰ মেৰি কমে। ২০১২ চনৰ ৮ আগষ্টত লন্ডন অলিম্পিকত ফ্লাইৱেইট শাখাত দেশক ব্রঞ্জৰ পদক উপহাৰ দিছিল মেৰি কমে। এইবাৰ সেই তালিকাত নাম সন্নিৱিষ্ট হ’ল অসম জীয়ৰী লাভলীনা বৰগাঁহাইৰ৷ ব্ৰঞ্জ নিশ্চিত, কিন্তু আমি সোণ বা ৰূপলৈ অপেক্ষাৰত৷

গোলাঘাটৰ বাৰমুখীয়া গাঁৱত ১৯৯৭ চনৰ ২ অক্টোবৰত জন্মলাভ কৰা লাভলীনা বৰগোঁহাই এতিয়া আৰু কেৱল অসম কন্যা হৈ থকা নাই৷ লাভলীনা বৰ্তমান দেশবাসীৰ গৌৰৱ, নয়নৰ মণি৷ টকিঅ’ অলিম্পিকত পদক নিশ্চিত কৰি ইতিহাস গঢ়িলে লাভলীনাই৷

সৰুৰে পৰা লাভলীনাৰ চেহেৰা আছিল শক্তিশালী আৰু পেশীবহুল। তেওঁৰ দুই ভগ্নী লিচা আৰু লিমাৰ গঠনো একে ধৰণৰ আছিল। পিতৃ টিকেন বৰগোঁহাই ক্ষুদ্ৰ ব্যৱসায়ী। কিন্তু তিনি জীয়ৰীৰ খেলা-ধূলাৰ সপোনত কোনোদিনে বাধা আহিবলৈ দিয়া নাছিল। সাধ্য মতে চেষ্টা চলাই গৈছে তেওঁ।
অৱশ্যে বক্সিঙৰ কাৰণে বিখ্যাত হ’লেও, খেলা-ধূলাত লাভলীনাৰ প্রবেশ হৈছিল কিক বক্সিঙৰ জৰিয়তে। কিক বক্সিঙৰ এটি শাখা হ’ল মুয়ে থাই। সেই খেলাই প্রথম দৃষ্টি আকর্ষণ কৰিছিল লাভলীনাৰ। ১৩ বছৰ বয়সৰ পৰা লিচা আৰু লিমাৰ সৈতে কিকবক্সিং শিকিবলৈ আৰম্ভ কৰে।
লিচা আৰু লিমা কিকবক্সিঙত দোপতদোপে আগবাঢ়ি গ’লেও লাভলীনাৰ বেছি আগ্রহ আছিল বক্সিঙত। খেলবিধৰ প্রতি আগ্রহো সৃষ্টি হৈছিল অদ্ভুতভাবে। লাভলীনাৰ মাতৃ মামণি বৰগোঁহায়ে এক সাক্ষাৎকাৰত কৈছিল, “এদিন বাতৰি কাগজত বান্ধি সিহঁতৰ দেউতাকে কিবা মিঠাই আনিছিল। লাভলীনাই সেই কাগজখন কাঢ়ি নি পঢ়িবলৈ আৰম্ভ কৰে। তাতেই মহম্মদ আলীৰ বিষয়ে জানিব পাৰে। বক্সিঙৰ প্রতি আগ্রহ সৃষ্টি হয় তাৰ পৰাই৷’’ তিনিওজনী ছোৱালীয়েই কিকবক্সাৰ হোৱাটো বিচাৰিছিল যদিও লাভলীনাৰ সাফল্যত পিছে সুখী তেওঁৰ পিতৃ-মাতৃ৷

বৰপথাৰ হাইস্কুলত শিক্ষাগ্ৰহণ কৰিছিল লাভলীনাই। নৱম শ্রেণীত পঢ়ি থাকোঁতেই স্পর্টছ অথৰিটি অব ইণ্ডিয়াই (ছাই)স্কুলত এটি ট্রায়েলৰ আয়োজন কৰিছিল। তাতেই লাভলিনাৰ সুপ্ত প্রতিভা চিনিব পাৰে প্ৰশিক্ষক পাদুম বড়োই। তেওঁ লাভলীনাক প্রশিক্ষণ দিবলৈ আৰম্ভ কৰে।

অৱশ্যে লাভলীনাৰ ক্ৰীড়া জীৱনৰ এয়া যেন মাত্ৰ আৰম্ভণিহে৷ এতিয়াও তেওঁৰ পাবলৈ-দিবলৈ বহু বাকী৷ একেৰাহে দুবছৰ বিশ্ব চেম্পিয়নশ্বিপত ব্রঞ্জৰ পদক লাভ কৰিছে লাভলীনাই। এছিয়ান চেম্পিয়নশ্বিপতো দুটি ব্রঞ্জ পদক আছে তেওঁৰ নামত। ইয়াৰ উপৰি তেওঁৰ ভাৰত অ’পেনত সোণ, উলানবাটাৰ কাপত ৰূপ, আস্তানাত প্রেছিডেন্টছ কাপত ব্রঞ্জ আৰু পোলেণ্ডৰ ছিলেছিয়ান চেম্পিয়নশ্বিপত ব্রঞ্জ আছে লাভলীনাৰ পদকৰ জোলোঙাত।

এছিয়া আৰু ওছেনিয়া অলিম্পিক যোগ্যতা অর্জন পৰ্যায়ত উজবেকিস্তানৰ মাফতুনাখোন মেলিভাক ৫-০ পইণ্টত পৰাজিত কৰি অলিম্পিকলৈ যোগ্যতা নিশ্চিত কৰা অসম জীয়ৰী লাভলীনাই ভাৰতৰ পদক তালিকাত সংখ্যা বৃদ্ধি কৰিলে। কেৱল সেয়াই নহয়, আগন্তুক দুখন খেলত যদি লাভলীনাই নিজৰ যোগ্যতাভিত্তিত খেল প্ৰদৰ্শন কৰিব পাৰে তেনেহ’লে নিশ্চিত, সোণ নহ’লে ৰূপৰ পদকো আঁজুৰি আনিবলৈ সক্ষম লাভলীনা৷ এই মুহূৰ্তত অসমবাসী, ভাৰতবাসীৰ এটাই শুভেচ্ছা- সোণালী বা ৰূপালী কন্যা হৈ উভতি আহা লাভলীনা৷