কাৰ্বি আংলং (Karbi Anglong) জিলাৰ বৰপথাৰ থানাৰ অন্তৰ্গত গৰমপানীৰ ৩৯ নং ৰাষ্ট্ৰীয় ঘাইপথৰ ওপৰত আজি বিয়লি সংঘটিত হোৱা এক ভয়ংকৰ পথ দুৰ্ঘটনাত (Road Accident) এজন বাছচালক থিতাতে নিহত হোৱাৰ বিপৰীতে আন কেইবাজনো যাত্ৰী অতি গুৰুতৰভাৱে আহত হয়।
প্ৰাপ্ত তথ্য অনুসৰি, গোলাঘাট অভিমুখে গৈ থকা এএছ-০৩-বিচি-৪৭০৭ নম্বৰৰ যাত্ৰীবাহী বাছখনৰ সৈতে বিপৰীত দিশৰ পৰা আহি থকা এএছ-০৫-এচি-১১৬০ নম্বৰৰ ট্ৰাকখনৰ প্ৰচণ্ড জোৰেৰে হোৱা মুখামুখি সংঘৰ্ষৰ ফলত দুৰ্ঘটনাটো সংঘটিত হয়।
দুৰ্ঘটনাটোত বাছখনৰ চালক বাবুল আলি থিতাতে নিহত হোৱাৰ বিপৰীতে আন কেইবাজনো যাত্ৰীক সংকটজনক অৱস্থাত গোলাঘাট কুশল কোঁৱৰ অসামৰিক চিকিৎসালয়লৈ প্ৰেৰণ কৰা হয়। ভয়ংকৰ দুৰ্ঘটনাটোত যাত্ৰীবাহী বাছখন চূচূৰ্মৈ হয়।
