পেটৰ তাড়নাত ভিক্ষা বৃত্তিত নিয়োজিত হৈ অহাটো আমি সকলোৱে দেখিছোঁ। আনহাতে, এই ভিক্ষা খোজাৰ পন্থাও বিভিন্ন দেখিছোঁ। কিন্তু অনলাইন অৰ্থাৎ ডিজিটেল ভিক্ষাৰী(Online Bagger)? হয় বৰ্তমান সেয়াও সম্ভৱ।
মুম্বাইৰ ৰাজপথত দেখা গʼল ডিজিটেল ভিক্ষাৰী। আপোনাৰ পকেটত খুচুৰা নাই? তাতে কি হ’ল। ইচ্ছা কৰিলে অনলাইনত সহায় কৰিব পাৰে। শেহতীয়াকৈ এজন ব্যক্তিয়ে হাতত কিউআৰ কোড লৈ স্থানীয় ৰেʼলত সহায় বিচৰা দেখা গৈছে। উক্ত QR কোডত অনলাইন পেমেণ্টৰ সুবিধা আছে। তেওঁৰ এই ভিডিঅʼটো ছচিয়েল মিডিয়াত ধুমুহাৰ দৰে বিয়পি পৰিছে। ব্যস্ত ৰাস্তা, বাছ বা ৰেʼলত প্ৰতিদিনে বহু ভিক্ষাৰী দেখা পোৱা যায়।
পেটৰ তাড়নাত আনৰ পৰা সহায় বিচাৰে। বহুতে তেওঁলোকক ‘নাই’ বুলি কয়। কিছুমানে নগদ ধনৰ অভাৱ বা খুচুৰাৰ অভাৱক অজুহাত হিচাপে লয়। এনে পৰিস্থিতিৰ সৈতে মোকাবিলা কৰিবলৈ যুৱকজনে ডিজিটেল পদ্ধতিৰে ভিক্ষা খুজিবলৈ ধৰিলে। ভিডিঅʼটোত এজন ভিক্ষাৰীয়ে ৰেʼলৰ ভিতৰত গান গাই সহায় বিচৰা দেখা গৈছে।
হাতত QR কোডৰ ষ্টীকাৰ থকা কাগজ। ৰেʼলখনত উপস্থিত থকা এজন ব্যক্তিয়ে ঘটনাৰ ভিডিঅ’ ৰেকৰ্ডিং কৰিছিল, যিটো ভিডিঅ’ এতিয়া ছচিয়েল মিডিয়াত ভাইৰেল হৈ পৰিছে। জ্ঞাত সূত্ৰৰ মতে, ব্যক্তিজনে যিদৰে QR কোড লৈ সহায় বিচাৰিছে, কাৰোবাৰ বাবে ‘নাই’ বুলি কোৱাৰ কোনো সুযোগেই নাথাকিব।
