হিংসাজৰ্জৰিত মণিপুৰত আন এক নৃশংস ঘটনাৰ কথা পোহৰলৈ আহিছে। প্রাক্তন ৰাষ্ট্রপতি এপিজে আব্দুল কালামৰ হাতৰ পৰা বঁটা লাভ কৰা স্বাধীনতা সংগ্রামী এছ চূড়াচান্দ সিঙৰ বৃদ্ধ পত্নীক জীৱন্তে জ্বলাই হত্যা কৰাৰ অভিযোগ উঠিছে (Kargil war veteran’s wife becomes a victim of humiliation)। এই সন্দৰ্ভত থানাত অভিযোগ দাখিল কৰিছে মৃতকৰ পৰিয়ালে।
এনডিটিভিৰ এক প্রতিবেদনত প্রকাশ পোৱা মতে, ঘটনাটি বিগত ২৮ মে’ৰ। অভিযোগ অনুসৰি, ঘটনাৰ দিনা কাকচিং জিলাৰ চেৰো গাঁৱত অজ্ঞাত পৰিচয়ৰ কিছু ব্যক্তিয়ে হাতত অস্ত্র-শস্ত্র লৈ এটি ঘৰৰ দুৱাৰ বাহিৰৰ পৰা বন্ধ বন্ধ কৰি দি জ্বলাই দিয়ে। সেই সময়ত ঘৰটোৰ ভিতৰত আছিল স্বাধীনতা সংগ্রামীজনৰ পত্নী ৮০ বছৰীয়া ইবেটোমবি।
কিছু কিছু সময় পাৰ হোৱাৰ পিছত গাঁওবাসীয়ে জুই নুমোৱায়। কিন্তু ঘৰৰ ভিতৰৰ পৰা উদ্ধাৰ হয় বৃদ্ধাগৰাকীৰ অগ্নিদগ্ধ মৃতদেহ। এই প্রসঙ্গত বৃদ্ধাগৰাকীৰ নাতিনীয়েক প্রেমকাঁটাই সংবাদ মাধ্যমক জনোৱা মতে, দুষ্কৃতিকাৰীয়ে তেওঁকো হত্যা কৰাৰ চেষ্টা কৰিছিল। আইতাকক ঘৰৰ ভিতৰৰ পৰা উদ্ধাৰ কৰিবলৈ যাওঁতে তেওঁৰো হাতত গুলী লাগে।
উক্ত ঘটনাৰ প্রায় দুমাহ পিছত জ্বলাই দিয়া ঘৰটোৰ ওচৰলৈ গৈছিল প্রেমকাঁটা। তাত ধ্বংসস্তূপ আঁতৰাই এখন ফটো উদ্ধাৰ কৰে তেওঁ। উক্ত ফটোত তেওঁৰ ককাকৰ সৈতে আছে প্রাক্তন ৰাষ্ট্রপতি কালামো। মণিপুৰৰ ৰাজধানী ইম্ফলৰ পৰা ৪৫ কিলোমিটাৰ দূৰৈত অৱস্থিত চেৰোও ৰাজ্যখনৰ হিংসাজৰ্জৰিত গাঁওবোৰৰ ভিতৰত তালিকাৰ শীর্ষত আছে।
