এইবাৰ আলফা স্বাধীনত যোগদান ৰাজ্যৰ এখন আগশাৰীৰ কাকতৰ সংবাদিকৰ। নাহৰকটীয়াৰ সাংবাদিক বিদ্যুৎ মহন্ত (Bidyut Mahanta, a journalist from Naharkatia)ই আলফা স্বাধীনত যোগদান (Join ULFA) কৰাৰ খবৰ পোহৰলৈ আহিছে। নাহৰকটীয়াৰ সংবাদদাতা বিদ্যুৎ মহন্তই আলফা স্বাধীনত যোগদান কৰাৰ কথা বুধবাৰে নিজে সামাজিক মাধ্যমযোগে জনাইছে। উল্লেখ্য যে এটি সন্তানৰ পিতৃ বিদ্যুৎ মহন্তৰ এই সিদ্ধান্তৰ কথা প্ৰকাশ পোৱাৰ পিছতে সাংবাদিক সমাজৰ লগতে ৰাজ্যৰ সচেতন মহলতো তীব্ৰ প্ৰতিক্ৰিয়াৰ সৃষ্টি হৈছে ।
পোষ্টটোত তেওঁ লিখিছে, “… ঔপনিৱেশিক ভাৰতীয় ৰাষ্ট্ৰ ব্যৱস্থাটোৱে আমাৰ স্ব-ভূমিত থলগিৰী জনগণক বন্য জীৱ-জন্তুৰ দৰে আচৰণ কৰাৰ উপৰি অসমৰ সকলো সম্পদ ভাৰতীয় পুঁজিপতি সকলে লুণ্ঠনৰাজ অব্যাহত ৰখাৰ পাছতো অসম দেশৰেই এজন থলগিৰী হিচাপে ভাৰতীয় চিন্তাৰ প্ৰবক্তা হ’বলৈ মোৰ বিবেকে কেতিয়াও অনুমতি নিদিয়ে। তথাকথিত সংবিধান নামৰ কিতাপখনৰ গণ্ডীত থাকি আমাৰ জাতি, আমাৰ দেশ (অসম)ৰ ৰাজনৈতিক, অৰ্থনৈতিক, সামাজিক আৰু সাংস্কৃতিক অধিকাৰ কেতিয়াও সুৰক্ষিত হ’ব নোৱাৰে। আইন আদালত ব্যৱস্থাও ভেকোভাওনাৰ বাহিৰে একো নহয়।…”
তেওঁ লগতে লিখিছে, “… ঔপনিৱেশিক ৰাষ্ট্ৰযন্ত্ৰৰ ন্যায়-বিচাৰত গণতান্ত্ৰিক প্ৰতিবাদ মূল্যহীন? সেয়েহে, তথা-কথিত ভাৰতীয় গণতন্ত্ৰৰ বিপৰীতে সশস্ত্ৰ প্ৰতিবাদ অপৰিহাৰ্য্য৷ আমাৰ এই প্ৰতিবাদী যাত্ৰাক ভুল বুলি অভিহিত কৰাৰ আগত ওপৰত উল্লিখিত প্ৰশ্নকেইটা নিজক এবাৰ কৰিব বুলি আশা ৰাখিলোঁ…।”
আনহাতে, পিতৃ-মাতৃক উদ্দেশ্যে তেওঁ লিখিছে, “মা-দেউতা মোক তোমালোকে ভুল নুবুজিবা। এই সময়ত তোমালোকক এনেদৰে এৰি অহাৰ বাবে হয়তো আন বহুতৰ দৰে তোমালোকেও পুত্ৰ দায়িত্বৰ পৰা পলায়ন কৰা বুলি ভাবিব পাৰা। প্ৰকৃততে তেনে নহয়। আমাৰ হাতত সময় তেনেই তাকৰ। বোধকৰোঁ তোমালোকে কথাবোৰ বুজিবা। দেশৰ স্বাধীনতাৰ সংগ্ৰামত জপিয়াই পৰিবলৈ গুচি আহিলোঁ মই৷ স্বদেশ-স্বজাতিৰ মুকুতিৰ বাবে নিজ সন্তানক উচ্ছৰ্গা কৰিব পৰাটো গৌৰৱ আৰু সৌভাগ্যৰ কথা৷ এই সৌভাগ্য সকলো পিতৃ-মাতৃয়ে লাভ নকৰে৷ তোমালোকে কৰিছা সেয়েহে, আজি নহ’লেও কাইলৈ তোমালোক গৌৰৱাম্বিত হ’বা৷”
পত্নীক উদ্দেশ্য কৰি পোষ্টটোত লিখিছে, ” ‘হিয়া’, আজিৰ পৰা মা-দেউতা আৰু আৰোহণৰ দায়িত্ব তোমাৰ ওপৰত এৰিলোঁ। সি ফুটবল খেলি ভাল পাই, তাক নিয়মিতভাৱে ফুটবল প্ৰশিক্ষণলৈ নিবলৈ চেষ্টা কৰিবা। মই জানো তুমি সহজ ভাৱে ল’ব নোৱাৰিবা। কিন্তু মোৰ বিশ্বাস আছে তুমি পাৰিবা, তুমি সাহসী মই জানো, গতিকে পাৰিবা। মোক লৈ বেজাৰ কৰি নাথাকিবা, জীৱনটোত আগুৱাই যাবা। যদি পাৰা মোক ক্ষমা কৰি দিবা…।”
উল্লেখ্য যে বাইকেৰে তেওঁ অৰুণাচললৈ যাব বুলি পৰিয়ালৰ আগত কৈ তেওঁ ওলাই গৈছিল । ইয়াৰ পাছতে বুধবাৰে দুপৰীয়া তেওঁ সামাজিক মাধ্যম ফেচবুকত পোষ্ট দি আলফাত যোগদান কৰাৰ কথা উল্লেখ কৰে । এই কথা জানিব পাৰি এতিয়া পৰিয়ালটোৰ মাজত হাহাকাৰ পৰিস্থিতিৰ সৃষ্টি হৈছে।
এটা কবিতাৰ জৰিয়তে তেওঁৰ আবেগ প্ৰকাশ কৰিছে এনেদৰে :
সপোনবোৰ পাহৰি দিঠকত ডুব যাম
জাতি প্ৰেমৰ ছাইৰঙী পকনীয়াত;
ৰহস্যময় হৃদয়েৰে বিলীন হ’ম এদিন
হাজাৰজনৰ ভাৱনাৰ চাকনৈয়াত।
নহওঁ মই কোনো মৰিছিকা খেদা
বিপ্লৱী,
এয়াতো নহয় কোনো অলীক কল্পনা,
আজুৰি আনিম এদিন আমাৰ হেৰুৱা স্বাধীনতা,
আৰু … সেইদিনা স্বাধীন বতাহজাকত উৰিব
উদিত সূৰুযৰ ৰক্তিম পতাকা।
মোৰ কবিতাৰ ৰক্তিম আভাসত
লিখি যাম দস্তাবেজ বুৰঞ্জীৰ পাতত। স্বাধীন অসমৰ ভূমিতহে শেষ হ’ব মোৰ অন্তিম পৃষ্ঠা।
ধূপ-ধূণাৰ কাষতে পৰি ৰ’ম চোতালত,
আৰু…চন্দনৰ সুবাসত গৌৰৱেৰে বিলীন হ’ম পঞ্চভূতত।
সোঁৱৰণিত ৰৈ যাব মাথোঁ
কঠিন বাস্তৱৰ ঠিকনা।।
