দলিত যুৱতী এগৰাকীয়ে কৰ্মক্ষেত্ৰত যৌন নিৰ্যাতনৰ (Sexual harassment) বিৰুদ্ধে প্ৰতিবাদ কৰাৰ বাবে তেওঁক গৰম তেলৰ এটা পাত্ৰত পেলাই দিয়াৰ অভিযোগ উত্থাপিত হৈছে। উত্তৰ প্ৰদেশৰ বাঘপতত সংঘটিত হৈছে এই ঘটনা। যুৱতীগৰাকী তেলৰ পাত্ৰত পৰি গুৰুতৰভাৱে আঘাতপ্ৰাপ্ত হয়। পিছত তেওঁক এখন চিকিৎসালয়ত ভৰ্তি কৰোৱা হৈছে। ইতিমধ্যে তেওঁ কাম কৰা কাৰখানাটোৰ গৰাকীকে ধৰি তিনিজন লোকক গ্ৰেপ্তাৰ কৰা হৈছে।
ভুক্তভোগীৰ ভাতৃয়ে শনিবাৰে আৰক্ষীৰ ওচৰত এই সন্দৰ্ভত এক অভিযোগ দাখিল কৰে। তেওঁ কয় যে তেওঁৰ পৰিয়ালৰ সদস্যসকলে ধনৌৰাৰ চিলভাৰনগৰ গাঁৱৰ এটা তেল কাৰখানাত কাম কৰে।
যুৱতীগৰাকীয়ে কাৰখানাত কাম কৰি আছিল। তেওঁক কাৰখানাৰ মালিক প্ৰমোদ আৰু তেওঁৰ দুজন সহযোগী ৰাজু আৰু সন্দীপে নিৰ্যাতন চলাইছিল। কিন্তু যুৱতীগৰাকীয়ে প্ৰতিবাদ কৰাত তেওঁৰ জাতিগত বিষয় উত্থাপন কৰি কটাক্ষ কৰে। যুৱতীগৰাকীৰ ভাতৃয়ে কয় যে অভিযুক্তকেইজনে তেওঁক গৰম তেলৰ এটা পাত্ৰত পেলাই দিয়ে।
ইফালে দিল্লীৰ এখন চিকিৎসালয়ত ভৰ্তি হৈ থকা যুৱতীগৰাকীয়ে আৰক্ষীক কয় যে অভিযুক্তকেইজনে তেওঁক তেলৰ পাত্ৰত পেলাই দিয়াৰ পূৰ্বে তেওঁৰ সৈতে দুৰ্ব্যৱহাৰ কৰিছিল, গালি-গালাজ কৰিছিল।
যুৱতীগৰাকীৰ শৰীৰৰ আধাতকৈও অধিক জ্বলি যায়। চক্ৰ বিষয়া বিজয় চৌধুৰীয়ে কয় যে অনুসূচিত জাতি আৰু অনুসূচিত জনজাতি (অত্যাচাৰ প্ৰতিৰোধ) আইনৰ অধীনত এটা গোচৰ ৰুজু কৰা হৈছে। তিনিজন লোকক গ্ৰেপ্তাৰ কৰা হৈছে। তদন্ত চলি আছে।
