পুনৰ মাওবাদী বিৰোধী অভিযানত বৃহৎ সফলতা ছত্তীশগড়ত (Chattisgarh) । এমাহৰো কম সময়ৰ ভিতৰত এই ঘটনা সংঘটিত হয়। এইবাৰ নিৰাপত্তাৰক্ষীৰে সংঘৰ্ষত ১২ জন মাওবাদী নিহত হয়। শুকুৰবাৰে আবেলি ছত্তীশগড়ৰ বিজাপুৰ জিলাৰ গংগালুৰত আৰক্ষী আৰু অৰ্ধসামৰিক বাহিনী আৰু মাওবাদীৰ মাজত সংঘৰ্ষ সংঘটিত হয়। সন্ধিয়া ছত্তীশগড়ৰ মুখ্যমন্ত্ৰী বিষ্ণুদেও সাইয়ে কয়, “গংগালুৰৰ উক্ত অঞ্চলত ১২ জন মাওবাদীৰ মৃতদেহ উদ্ধাৰ হৈছে।’’
উল্লেখযোগ্য যে এপ্ৰিল মাহত ছত্তীশগড়ত আৰক্ষী আৰু অৰ্ধসামৰিক বাহিনীৰ যুটীয়া অভিযানত ২৯ জন মাওবাদী নিহত হয়। কিন্তু অভিযানটো বস্তাৰত সংঘটিত হৈছিল। শুকুৰবাৰৰ অভিযান বিজাপুৰ জিলাত চলোৱা হয়। বস্তাৰৰ দৰে ইয়ো ছত্তীশগড়ৰ দক্ষিণৰ জিলাসমূহৰ ভিতৰত এখন। বস্তাৰ আৰু বিজাপুৰৰ ভিতৰত আছে ছত্তীশগড়ৰ দান্তেৱাড়া আৰু চুকমা জিলা। য’ত মাওবাদীসকল সক্ৰিয়।
মুখ্যমন্ত্ৰী সাইয়ে শুকুৰবাৰে বিজাপুৰত মাওবাদী বিৰোধী অভিযানৰ সফলতাৰ বাবে আৰক্ষী আৰু অৰ্ধসামৰিক বাহিনীক অভিনন্দন জনায়। উল্লেখযোগ্য যে এই বছৰ ১০০ ৰো অধিক মাওবাদী নিহত হৈছে।
জানুৱাৰীৰ পৰা এপ্ৰিললৈকে ৰাজ্যখনত নিহত মাওবাদীৰ সংখ্যা আছিল ৯১ জন। শুকুৰবাৰৰ অভিযানৰ পিছত ই ১০৩ লৈ বৃদ্ধি হয়। ২০১৯ চনৰ পিছত এটা বছৰত এইটো সৰ্বাধিক সংখ্যক মাওবাদী নিহত হোৱাৰ ঘটনা। আনহাতে, ২০১৮ চনত ১১২ জন মাওবাদী নিহত হৈছিল। একেদৰে ২১০৬ চনত ১৩৪ জন নিহত হৈছিল। ছত্তীশগড় ৰাজ্য সৃষ্টি হোৱাৰ পিছত এইটো সৰ্বাধিক সংখ্যা আছিল।
উল্লেখযোগ্য যে বিজাপুৰৰ গংগালুৰ অঞ্চলটো মাওবাদীসকলৰ দুৰ্গ হিচাপে গণ্য কৰা হয়। অঞ্চলটো বিজাপুৰৰ পিদিয়া আৰক্ষী থানাৰ অধীনত আহিছে। শুকুৰবাৰে অভিযানৰ সফলতা ঘোষণা কৰি সাইয়ে কয়, “প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহে সদায় কৈ আহিছে যে তেওঁলোকে ছত্তীশগড়ক মাওবাদীমুক্ত কৰিব বিচাৰে। ছত্তীশগড়ৰ মানুহে এতিয়া দ্বৈত ইঞ্জিন চৰকাৰৰ লাভালাভ অর্জন কৰিছে।’’
