উত্তৰাখণ্ডত (Uttarakhand) হোৱা ধাৰাসাৰ বৰষুণ আৰু ভূমিস্খলনৰ ফলত মৃত্যুৰ সংখ্যা ১২ জনলৈ বৃদ্ধি পাইছে। আহাতে, সন্ধানহীন হৈ আছে আন ৫০ জন লোক। আটাইতকৈ বেছি ক্ষতিগ্ৰস্ত হৈছে চাৰিখন জিলা। ইয়াৰে ভিতৰত হৰিদ্বাৰ, টিহৰি, ডেৰাডুন আৰু চামোলী অন্যতম। এই চাৰিখন জিলাত বহু ঘৰ উটুৱাই নিয়াৰ উপৰি পথটোও ভাঙি গৈছে।
ৰাজ্যখনৰ দুৰ্যোগ ব্যৱস্থাপনা বিভাগৰ তথ্য অনুসৰি, হৰিদ্বাৰত ৬ জন লোকৰ মৃত্যু হৈছে। তিহৰীত তিনিজন লোকৰ মৃত্যু হয়। আহাতে, ডেৰাডুনত দুজন আৰু চামোলীত এজনৰ মৃত্যু হৈছে। হালদোৱানী আৰু চামোলিত সন্ধানহীন হৈ আছে দুজন। ডেৰাডুনৰ আৰক্ষী অধীক্ষক অজয় সিঙে জনোৱা মতে, ৰায়পুৰ অঞ্চলত দুজন লোকক পানীয়ে উটুৱাই লৈ যায়। পিছত তেওঁলোকৰ মৃতদেহ উদ্ধাৰ কৰা হয়। ইফালে ধাৰাসাৰ বৰষুণৰ ফলত ডেৰাডুনৰ বহু অঞ্চল পানীত বুৰ গৈছে। বতৰ বিভাগৰ তথ্য অনুসৰি, বিগত ২৪ ঘণ্টাত ডেৰাডুনত ১৭২ মিলিমিটাৰ বৰষুণ হৈছে।
বিগত ২৪ ঘণ্টাত হৰিদ্বাৰৰ ৰোচনাবাদত সৰ্বাধিক বৰষুণ ২১০ মিলিমিটাৰ হৈছে। আনহাতে, সোণপ্ৰয়াগত মন্দাকিনী নদীৰ জলপৃষ্ঠই বিপদসীমাত উপনীত হোৱাত পৰিস্থিতি অধিক জটিল হৈ পৰিছে। হৰিদ্বাৰৰ ৰূঢ়কীৰ ভৰপুৰ গাঁৱত ধাৰাসাৰ বৰষুণৰ ফলত এটা ঘৰ ভাঙি নিহত হয় চাৰিজন লোক। আহত হয় আন ১০ জন। ইয়াৰে ৮ জনৰ অৱস্থা সংকটজনক।
