আজি ৰাজ্যৰ ১৪ খন জিলাত অনুষ্ঠিত হৈছে প্ৰথম পৰ্যায়ৰ পঞ্চায়ত নিৰ্বাচনৰ ভোটগ্ৰহণ (Panchayat Election)। পুৱা ৭.৩০ বজাৰ পৰা ভোটগ্ৰহণ কেন্দ্ৰসমূহত ভোটগ্ৰহণ আৰম্ভ হৈছে। আনহাতে,দ্বিতীয় পৰ্যায়ৰ ভোটগ্ৰহণ অনুষ্ঠিত হ’ব অহা ৭ মে’ত।
প্ৰথম পৰ্যায়ত ভোটগ্ৰহণ অনুষ্ঠিত হোৱা জিলাকেইখন হৈছে তিনিচুকীয়া, ডিব্ৰুগড়, চৰাইদেউ, শিৱসাগৰ, মাজুলী, যোৰহাট, গোলাঘাট, ধেমাজি, লখিমপুৰ, শোণিতপুৰ, বিশ্বনাথ, কাছাৰ, হাইলাকান্দি আৰু শ্ৰীভূমি। ভোটগ্ৰহণ কাৰ্য নিয়াপিকৈ পৰিচালনাৰ বাবে প্ৰায় ১.২০ লাখ বিষয়া-কৰ্মচাৰী নিয়োগ কৰা হৈছে।
দুয়োটা পৰ্যায় মিলি মুঠ ভোটাৰৰ সংখ্যা হৈছে ১.৮ কোটি। ইয়াৰে ভিতৰত ৯০.৭১ লাখ পুৰুষ, ৮৯.৬৯ লাখ মহিলা আৰু অন্যান্য শ্ৰেণীৰ৪০৮ গৰাকী ভোটাৰ। আনহাতে, ভোটকেন্দ্ৰৰ সংখ্যা হৈছে ২৫,০০৭ টা।
উল্লেখ্য যে এইবাৰ পঞ্চায়ত নিৰ্বাচনত ৩৯৭ গৰাকী জিলা পৰিষদৰ প্ৰাৰ্থী, ২,১৯২ গৰাকী আঞ্চলিক পঞ্চায়তৰ আৰু ২১,৯২০ গৰাকী গাঁও পঞ্চায়তৰ প্ৰাৰ্থী। ইয়াৰে ৯,২৭০ খন আসন অসংৰক্ষিত আৰু ১০,৮৮৩ খন আসন মহিলাৰ বাবে সংৰক্ষিত।
উল্লেখ্য যে অহা ৭ মে’ত আন ১৪ খন জিলাত ভোটগ্ৰহণ অনুষ্ঠিত হোৱাৰ পিছত অহা ১১ মে’ত ফলাফল ঘোষণা কৰা হ’ব৷
