তামিলনাডুৰ শিৱকাশিত এটা ফটকা কাৰখানাত ভয়ংকৰ বিস্ফোৰণৰ (Tamilnadu Blast) ঘটনা সংঘটিত হয়। বিস্ফোৰণৰ তীব্ৰতা ইমানেই বেছি আছিল যে কাৰখানাটোৰ বেছিভাগেই ধ্বংস হৈ যায়
স্থানীয় সূত্ৰই দাবী কৰিছে যে বিস্ফোৰণৰ শব্দ কেইবা কিলোমিটাৰ দূৰৈৰ পৰা শুনা গৈছিল। মঙলবাৰে পুৱা শিৱকাশিৰ সমীপৰ চিনকমনপট্টিত সংঘটিত হয় এই ঘটনা। বিৰুধনগৰ জিলাৰ আৰক্ষী অধীক্ষক কান্ননে সংবাদ সংস্থা এ এন আইক জনোৱা মতে, বিস্ফোৰণৰ ফলত কমেও চাৰিজন লোকৰ থিতাতে মৃত্যু হয়।
আহত ৫ জন লোকক উদ্ধাৰ কৰি চিকিৎসালয়ত ভৰ্তি কৰোৱা হৈছে। অৱশ্যে কাৰখানাটোৰ ভিতৰত আবদ্ধ হৈ থকা লোকৰ সংখ্যা স্পষ্ট হোৱা নাই। আহত আৰু মৃতকৰ সংখ্যা আৰু বৃদ্ধি পাব পাৰে বুলি আশংকা কৰিছে স্থানীয় প্ৰশাসনে।
স্থানীয় সূত্ৰৰ পৰা জানিব পৰা মতে, মঙলবাৰে পুৱা এক প্ৰবল বিস্ফোৰণে চিনকমনপট্টি জোকাৰি যায়। বিস্ফোৰণৰ তীব্ৰতা ইমানেই বেছি আছিল যে কাষৰ কেইবাটাও ঘৰৰ খিৰিকী ছিন্নভিন্ন হৈ পৰে। বিস্ফোৰণৰ সময়ত বহু শ্ৰমিকে কাৰখানাটোৰ ভিতৰত কাম কৰি আছিল।
বিস্ফোৰণৰ ফলত ভাঙি পৰে কাৰখানাটো। তলত কোনোবা আবদ্ধ হৈ আছে নেকি সেই সন্দৰ্ভত তদন্ত অব্যাহত আছে। অৱশ্যে বিস্ফোৰণৰ কাৰণ এতিয়াও স্পষ্ট হোৱা নাই। উল্লেখ্য যে যোৱা বছৰো একেধৰণৰ বিস্ফোৰণত ১০ জন লোকৰ মৃত্যু হৈছিল। ইয়াৰ পিছত কেন্দ্ৰীয় প্ৰদূষণ নিয়ন্ত্ৰণ ব’ৰ্ড আৰু ৰাষ্ট্ৰীয় সেউজ ন্যায়াধিকৰণৰ তদন্তকাৰী দল শিৱকাশীলৈ যায়।
সেই সময়ত তদন্তকাৰী দলটোৱে কেইবাটাও অনিয়ম উদ্ধাৰ কৰে। তদন্তকাৰী দলটোৱে সুৰক্ষাৰ সন্দৰ্ভতো প্ৰশ্ন উত্থাপন কৰে। মঙলবাৰে বিস্ফোৰণ সংঘটিত হোৱা কাৰখানাটোত সুৰক্ষা সন্দৰ্ভত কিবা গাফিলতি হৈছে নেকি সেই বিষয়ে আৰক্ষীয়ে তদন্ত অব্যাহত ৰাখিছে।
