ড’নাল্ড ট্ৰাম্পৰ প্ৰশাসনে ভাৰতীয় সামগ্ৰীৰ ওপৰত ৫০ শতাংশ শুল্ক আৰোপ কৰিছে। সেই পথ অনুসৰণ কৰি, মেক্সিকোৱে কিছুমান ভাৰতীয় সামগ্ৰীৰ ওপৰত একে পৰিমাণৰ শুল্ক আৰোপ কৰাৰ সিদ্ধান্ত লৈছে। নতুন দিল্লীয়ে এইবাৰ মুখ মেলিছে। নতুন দিল্লীয়ে স্পষ্ট কৰি দিছে যে যদি অচলাৱস্থা আলোচনাৰ জৰিয়তে সমাধান কৰা নহয় তেন্তে ভাৰতেও উপযুক্ত পদক্ষেপ গ্ৰহণ কৰিব। মেক্সিকোৰ চিনেটে এক নতুন শুল্ক নীতিত অনুমোদন জনাইছে।
মেক্সিকোৰ মুক্ত বাণিজ্য চুক্তি নথকা দেশসমূহৰ সামগ্ৰীৰ ওপৰত ৫ৰ পৰা ৫০ শতাংশলৈকে শুল্ক আৰোপ কৰা হ’ব। সেই তালিকাত ভাৰতো আছে। ইয়াৰ উপৰি আছে ইণ্ডোনেছিয়া, দক্ষিণ কোৰিয়া, চীন আৰু থাইলেণ্ড। সূত্ৰ অনুসৰি, নতুন দিল্লীয়ে এই বিষয়ত মেক্সিকোৰ সৈতে আলোচনা কৰি আছে। ভাৰতক নতুন শুল্ক নীতিৰ পৰা আঁতৰাই ৰাখিবলৈ এক আবেদন আছিল। কিন্তু মেক্সিকান চৰকাৰে মান্তি হোৱা নাছিল।
এজন বিষয়াই পিটিআইক কয় যে মেক্সিকান সংসদত নতুন শুল্ক নীতি বিধেয়কখন উত্থাপন কৰাৰ পিছতে মেক্সিকান বিষয়াসকলৰ সৈতে আলোচনা আৰম্ভ হৈছিল। ভাৰতৰ বাণিজ্য মন্ত্ৰালয়ে মেক্সিকোৰ বিত্ত মন্ত্ৰালয়ৰ সৈতে এক চুক্তিৰ ওপৰত আলোচনা কৰি আছিল যি গোলকীয় বাণিজ্য নীতি অনুসৰি দুয়োখন দেশৰ বাবে পাৰস্পৰিক লাভজনক হ’ব। দুয়োখন দেশৰ মাজত এখন বৈঠকো হৈছিল। “চৰকাৰ ভাৰতৰ ৰপ্তানিকৰ্তাসকলৰ স্বাৰ্থ সুৰক্ষিত কৰিবলৈ প্ৰতিশ্ৰুতিবদ্ধ। সেইমতে পদক্ষেপ লোৱা হ’ব।
দুয়োখন দেশে আলোচনা অব্যাহত ৰাখিছে। ভাৰতে মেক্সিকোৰ সৈতে ইয়াৰ বাণিজ্যিক সম্পৰ্কক যথেষ্ট গুৰুত্ব প্ৰদান কৰে।” ভাৰতে মেক্সিকোলৈ বিভিন্ন অটো পাৰ্টছ, বৈদ্যুতিক সঁজুলি, জৈৱৰাসায়নিক, ফাৰ্মাচিউটিকেল, পোছাক আৰু প্লাষ্টিক সামগ্ৰী ৰপ্তানি কৰে। পৰিসংখ্যা অনুসৰি, ভাৰতে ২০২৪-২৫ বৰ্ষত মেক্সিকোলৈ ৫২,০০০ কোটি টকাৰ সামগ্ৰী ৰপ্তানি কৰিছিল।
মেক্সিকোৰ পৰা ২৬,০০০ কোটি টকাৰ সামগ্ৰী আমদানি কৰা হৈছিল। নতুন দিল্লী কিছু পৰিমাণে অসন্তুষ্ট যে মেক্সিকোৱে ভাৰতীয় কৰ্তৃপক্ষৰ সৈতে কোনো আগতীয়া পৰামৰ্শ অবিহনে উচ্চ শুল্ক আৰোপ কৰাৰ সিদ্ধান্ত লৈছে। পিটিআইয়ে এজন চৰকাৰী বিষয়াৰ উদ্ধৃতি দি এই কথা কয়।
