প্ৰট’কল ভংগ কৰি প্ৰধানমন্ত্ৰী নৰেন্দ্ৰ মোদী (PM Modi)য়ে ভাৰত ভ্ৰমণলৈ অহা এজন বিদেশী নেতাক আদৰণি জনাবলৈ বিমানবন্দৰত উপস্থিত হয়। ৰাছিয়াৰ ৰাষ্ট্ৰপতি ভ্লাদিমিৰ পুটিনৰ পিছত এইবাৰ সংযুক্ত আৰব আমিৰশ্বাহীৰ (UAE) ৰাষ্ট্ৰপতি শ্বেখ মহম্মদ বিন জায়েদ আল নাহিয়ান (Sheikh Mohammed bin Zayed Al Nahyan)ৰ বাবে এইদৰে প্ৰট’কল ভংগ কৰে।
সোমবাৰে বিয়লি দিল্লীৰ পামৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত উপস্থিত হৈ জায়েদক আদৰণি জনায় প্ৰধানমন্ত্ৰী নৰেন্দ্ৰ মোদীয়ে। ৰাণৱেত থিয় হৈ থকা অৱস্থাত মোদীয়ে জায়েদক কৰমৰ্দন কৰি আলিঙ্গন কৰে । ইয়াৰ পিছত ৰেড কাৰ্পেটত একেলগে খোজকাঢ়ি গৈ একেখন গাড়ীতে ওলাই যায়। যোৱা ৪ ডিচেম্বৰতো মোদীয়ে একে ধৰণেৰে দিল্লী বিমানবন্দৰত পুটিনক আদৰণি জনাইছিল।
সাধাৰণ প্ৰট’কল অনুসৰি কোনো বিদেশী নেতাই যেতিয়া ভাৰত ভ্ৰমণ কৰে তেতিয়া তেওঁক আদৰণি জনাবলৈ বিদেশ মন্ত্ৰী বা বৈদেশিক পৰিক্ৰমা মন্ত্ৰালয়ৰ ৰাজ্যিক মন্ত্ৰী বিমানবন্দৰত উপস্থিত থাকে বা আন কোনো দায়িত্বশীল মন্ত্ৰী উপস্থিত হয়। পুটিনৰ পূৰ্বে মোদীয়ে ২০১৭ চনত বাংলাদেশৰ তদানীন্তন প্ৰধানমন্ত্ৰী শ্বেখ হাছিনাক দিল্লী বিমানবন্দৰত আদৰণি জনাই প্ৰট’কল ভংগ কৰিছিল। ২০১৮ চনত মোদীয়ে নিজেই ইজৰাইলৰ প্ৰধানমন্ত্ৰী বেঞ্জামিন নেতানিয়াহুক বিমানবন্দৰত আদৰণি জনাইছিল।
মোদীৰ আমন্ত্ৰণত তৃতীয়বাৰৰ বাবে ভাৰত ভ্ৰমণলৈ আহিছে জায়েদ। বৈদেশিক পৰিক্ৰমা মন্ত্ৰালয়ৰ এক সূত্ৰই জনোৱা মতে, তেওঁৰ ভ্ৰমণৰ সময়ত দুয়োখন দেশৰ দ্বিপাক্ষিক কৌশলগত সম্পৰ্কই এক নতুন মাত্ৰা লাভ কৰিব। ভাৰত আৰু সংযুক্ত আৰব আমিৰশ্বাহীৰ মাজত বাণিজ্য আৰু বিনিয়োগৰ সম্পৰ্ক দীৰ্ঘদিনীয়া। দুয়োখন দেশৰ স্থানীয় মুদ্ৰা ব্যৱস্থাপনা, বিত্তীয় সহযোগিতা চুক্তি, দ্বিপাক্ষিক বিনিয়োগ চুক্তি, নতুন দিল্লী-আবুধাবি শক্তি যোগানৰ সৈতে জড়িত কেইবাটাও দীৰ্ঘদিনীয়া চুক্তি আছে। ২০১৯ চনৰ আগষ্ট মাহত আবুধাবি ভ্ৰমণৰ সময়ত মোদীক সৰ্বোচ্চ অসামৰিক সন্মান ‘অৰ্ডাৰ অব জায়েদ’ প্ৰদান কৰি নতুন দিল্লীৰ সৈতে দ্বিপাক্ষিক সম্পৰ্ক আৰু অধিক শক্তিশালী কৰাৰ স্পষ্ট বাৰ্তা প্ৰেৰণ কৰে ইউ এ ইয়ে। ২০২২ চনত আবুধাবিৰ তেতিয়াৰ শাসক জায়েদ বৰ্তমান দেশখনৰ ৰাষ্ট্ৰপতি।
