ভাৰতৰ জলসীমাৰ ওচৰত প্ৰায় ৯৫ লাখ বেৰেল ৰাছিয়াৰ তেল আছ। দিল্লীয়ে যদি ইচ্ছা কৰে তেন্তে মস্কোৱে সেই তেল ভাৰতলৈ আনিবলৈ ইচ্ছুক। এই কথা ৰয়টাৰে সূত্ৰৰ জৰিয়তে প্ৰকাশ কৰিছে। এনে পৰিস্থিতিত কেইসপ্তাহমানৰ ভিতৰত এই তেল ভাৰতত উপস্থিত হ’ব পাৰে বুলি সূত্ৰসমূহে দাবী কৰিছে।
আমেৰিকা-ইৰাণৰ যুদ্ধ পৰিস্থিতিয়ে সমগ্ৰ পশ্চিম এছিয়াত (Iran Crisis) অশান্তি বিয়পাইছে। ভাৰতীয় বাণিজ্যৰ বাবে অতি গুৰুত্বপূৰ্ণ জলপথ হৰমুজ প্ৰণালীতো ইয়াৰ প্ৰভাৱ পৰিছে। যুদ্ধ পৰিস্থিতিত ইৰাণে জলপথ অৱৰোধ কৰিছে। ইয়াৰ মাজেৰে যোৱা যিকোনো জাহাজ জ্বলাই দিব বুলি ভাবুকি দিছে। বুধবাৰে হৰমুজ প্ৰণালীত এখন জাহাজৰ ওপৰত আক্ৰমণ কৰা হয়।
ভাৰতে প্ৰায় ৪০ শতাংশ খাৰুৱা তেল এই জলপথৰ জৰিয়তে আমদানি কৰে। কিন্তু এই জলপথৰ মাজেৰে জাহাজ চলোৱাটো অশান্ত পশ্চিম এছিয়াত কঠিন হৈ পৰিছে। যিহেতু হৰমুজ প্ৰণালী প্ৰায় অৱৰোধ হৈ পৰিছে, সেয়েহে দিল্লীয়েও বিকল্প ব্যৱস্থা বিচাৰিবলগা হৈছে। কাৰণ ভাৰতৰ মুঠ তেলৰ চাহিদাৰ প্ৰায় ৮০ শতাংশই বহিঃৰাষ্ট্ৰৰ পৰা আহে।
ইতিমধ্যে মস্কোৱে কৈছে যে বিশেষ পৰিস্থিতিৰ সৃষ্টি হ’লে ভাৰতৰ কাষত থিয় দিবলৈ সাজু। ইতিমধ্যে ৰাছিয়াই কৈছে যে ভাৰতৰ শক্তি যোগানত যদি কিবা সমস্যা হয়, তেন্তে সেই চাহিদা পূৰণ কৰিবলৈ ৰাছিয়া সাজু।
এইবাৰ মস্কোৱে নিজৰ স্থিতি অধিক স্পষ্ট কৰি তুলিছে।
সূত্ৰৰ ভিত্তিত ৰয়টাৰে ভাৰতৰ জলসীমাৰ আশে-পাশে মালবাহী জাহাজৰ বহৰ থকাৰ বাতৰি প্ৰকাশ কৰিছে। সেই বহৰত থকা জাহাজবোৰ ৰাছিয়াৰ নহয়। অৱশ্যে তেওঁলোকে ৰাছিয়াৰ তেল কঢ়িয়াই লৈ ফুৰিছে। মুঠতে সেই বহৰত প্ৰায় ৯৫ লাখ বেৰেল তেল আছে।
ইচ্ছা কৰিলে কেইসপ্তাহমানৰ ভিতৰত ভাৰতলৈ পঠিয়াব পাৰিব। সেই তেলৰ গন্তব্যস্থান ভাৰতৰ বাবে সলনি কৰিবলৈ ৰাছিয়া সাজু বুলিও সূত্ৰটোৱে দাবী কৰিছে। অৱশ্যে সেই জাহাজবোৰ তেলৰ সৈতে ক’লৈ গৈ আছিল সেয়া এতিয়াও স্পষ্ট হোৱা নাই।
