আমেৰিকা-ইৰাণৰ যুদ্ধ (Iran Crisis) পৰিস্থিতিত আবদ্ধ হৈ আছে ৩৭ খন ভাৰতীয় জাহাজ। ইৰাণে হৰমুজ প্ৰণালী ‘বন্ধ’ কৰাৰ বাবে আন বহু জাহাজৰ লগতে এই জাহাজসমূহেও সমস্যাৰ সন্মুখীন হৈছে। এই জাহাজসমূহ পাৰ্চী উপসাগৰ, ওমান উপসাগৰ আৰু কাষৰীয়া সাগৰত আবদ্ধ হৈ আছে।
কোৱা হৈছে যে ভাৰতীয় পতাকা থকা এই জাহাজসমূহত ১০০০ৰো অধিক নাৱিক আৰু নৌসেনাৰ জোৱান আছে। ইয়াৰে কিছুমান জাহাজে ভাৰতীয় বন্দৰলৈ ইন্ধন তেল আৰু লিকুইড নাইট্ৰ’জেন গেছ (এল এন জি) কঢ়িয়াই লৈ ফুৰিছে। কিছুমান জাহাজে পাৰস্য উপসাগৰীয় দেশৰ পৰা পেট্ৰ’লিয়াম সামগ্ৰী আনিবলৈ গৈ আছে।
শেহতীয়া পৰিস্থিতিত এই জাহাজসমূহে সমস্যাৰ সন্মুখীন হৈছে। ভাৰতীয় ৰাষ্ট্ৰীয় জাহাজ মালিক সন্থায়ো আবদ্ধ ভাৰতীয় জাহাজক লৈ উদ্বেগ প্ৰকাশ কৰিছে। এই সমস্যা সমাধানৰ বাবে কেন্দ্ৰীয় চৰকাৰক হস্তক্ষেপ কৰিবলৈও সংগঠনটোৱে অনুৰোধ জনাইছে।
জাহাজ মালিক সন্থাই এক বিবৃতিত কয় যে দেশৰ প্রয়োজনীয়তা পূৰণৰ বাবে প্রায় ৩৭ খন ভাৰতীয় পতাকা থকা জাহাজ পশ্চিম এছিয়াত আছে৷ কিন্তু জাহাজবোৰত ইতিমধ্যে বোজাই কৰা হৈছে। কিছুমানে সামগ্ৰী লোড কৰিবলৈ গৈ আছে।
তেওঁলোকে বিবৃতিটোত লিখিছে, “এই জাহাজসমূহ হৰমুজ প্ৰণালীৰ দুয়োপাৰে আছে। আমি চৰকাৰক আহ্বান জনাইছো যে এই জাহাজসমূহে যাতে নিৰাপদে হৰমুজ প্ৰণালীৰ মাজেৰে পাৰ হ’ব পাৰে তাৰ বাবে পদক্ষেপ গ্ৰহণ কৰক।”
ভাৰতৰ জাহাজ নিয়ন্ত্ৰক জাহাজ পৰিবহণ সঞ্চালকালয়েও এই পৰিস্থিতিৰ ওপৰত নজৰ ৰাখিছে। জাহাজ কোম্পানীৰ সৈতে নিয়মীয়াকৈ যোগাযোগত আছে।
সংবাদ সংস্থা পি টি আইৰ তথ্য অনুসৰি, পশ্চিম এছিয়াৰ সংঘাতত বিদেশী জাহাজত কমেও তিনিজন ভাৰতীয় নাৱিকৰ মৃত্যু হৈছে। আহত হৈছে এজন লোক। জানিব পৰা মতে, ইতিমধ্যে জাহাজ মন্ত্ৰালয়ে সংশ্লিষ্ট কৰ্তৃপক্ষৰ সৈতে যোগাযোগ ৰাখিবলৈ আৰু ভাৰতীয় নাৱিকসকলক দ্ৰুত সহায় আগবঢ়াবলৈ দ্ৰুত সঁহাৰিৰ দল গঠন কৰি আছে।
বুধবাৰে ইৰাণৰ ‘ইছলামিক ৰিভল্যুচনেৰী গাৰ্ড’-এ দাবী কৰে যে তেওঁলোকে হৰমুজ প্ৰণালী সম্পূৰ্ণৰূপে দখল কৰিছে। উক্ত খবৰ প্ৰকাশ হোৱাৰ লগে লগে বিশ্বৰ বহু দেশ স্তম্ভিত হৈ পৰে।
বৰ্তমান হৰমুজ প্ৰণালীৰ দুয়োকাষে শ শ জাহাজ আবদ্ধ হৈ আছে। আগবাঢ়িবও পৰা নাই, পিছুৱাবও পৰা নাই। ইৰাণে আৰোপ কৰা নিষেধাজ্ঞাৰ বাবে হৰমুজ প্ৰণালীত জাহাজ চলাচল স্থবিৰ হৈ পৰিছে। ভাৰতৰ দৰে আমেৰিকাৰ জাহাজবোৰো তাৰ মাজত আছে।
