আগন্তুক অসম বিধানসভা নিৰ্বাচনৰ (Assam Election) বাবে দাখিল কৰা মনোনয়ন পত্ৰ (Nomination Form)সমূহৰ পৰীক্ষা মঙলবাৰে সম্পন্ন হয়। কিন্তু মুঠ ১২৬টা বিধানসভা সমষ্টিৰ ভিতৰত ১২৪টাৰহে মনোনয়ন পত্ৰৰ পৰীক্ষা এতিয়ালৈকে সম্পূৰ্ণ হৈছে। দুটা সমষ্টিৰ মনোনয়ন পৰীক্ষা সম্পূৰ্ণ হোৱা নাই আৰু এই সমষ্টি দুটাৰ মনোনয়ন পৰীক্ষা বুধবাৰে পুৱা ১১ বজালৈকে স্থগিত ৰখা হৈছে। এই সমষ্টি দুটা হৈছে ২৪ নং বৰপেটা (অনুসূচিত জাতি) আৰু ৬৫ নং ঢেকীয়াজুলি।
অসম ৰাজ্যিক যুটীয়া নিৰ্বাচনী বিষয়াই ঘোষণা কৰা অনুসৰি, মনোনয়ন পৰীক্ষা সম্পূৰ্ণ হোৱা ১২৪টা সমষ্টিত মুঠ ৭৭৬ গৰাকী প্ৰাৰ্থীৰ মনোনয়ন বৈধ হিচাপে গ্ৰহণ কৰা হৈছে। উল্লেখযোগ্য যে এইবাৰ নিৰ্বাচনৰ বাবে মুঠ ৮১৫ গৰাকী প্ৰাৰ্থীয়ে মনোনয়ন দাখিল কৰিছিল। আনহাতে, তেওঁলোকে দাখিল কৰা মনোনয়ন পত্ৰৰ সংখ্যা আছিল ১,৩৮৯ খন। যোৱা ২৩ মাৰ্চত মনোনয়ন দাখিলৰ অন্তিম তাৰিখ আছিল। আনহাতে, মনোনয়ন বৈধ হোৱা প্ৰাৰ্থীসকলৰ ভিতৰত কোনোবাই যদি নিজৰ মনোনয়ন উঠাই ল’ব বিচাৰে তেন্তে ২৬ মাৰ্চৰ বিয়লি ৩ বজাৰ ভিতৰত সেইটো কৰিব পাৰিব।
