কৰ্ণেল ছোফিয়া কুৰেশ্বীৰ (Sofia Qureshi) ওপৰত কৰা মন্তব্যৰ বাবে মধ্যপ্ৰদেশৰ মন্ত্ৰী বিজয় শ্বাহৰ বিৰুদ্ধে কিয় কোনো ব্যৱস্থা গ্ৰহণ কৰা হোৱা নাই? শুকুৰবাৰে উচ্চতম ন্যায়ালয়ে ৰাজ্য চৰকাৰক তেওঁৰ বিৰুদ্ধে ব্যৱস্থা ল’বলৈ কয়। উচ্চতম ন্যায়ালয়ৰ পৰ্যবেক্ষণ, ‘যথেষ্ট হৈছে’!
মুখ্য ন্যায়াধীশ সূৰ্য কান্ত আৰু ন্যায়াধীশ জায়মল্য বাগচিৰ বিচাৰপীঠে মন্ত্ৰীগৰাকীৰ বিৰুদ্ধে গোচৰ ৰুজু কৰিবনে নকৰে সেয়া চাৰি সপ্তাহৰ ভিতৰত সিদ্ধান্ত ল’ব লাগিব বুলি নিৰ্দেশ দিয়ে। চলিত বৰ্ষৰ আৰম্ভণিতে উচ্চতম ন্যায়ালয়ে এই নিৰ্দেশ দিছিল।
শুকুৰবাৰে উচ্চতম ন্যায়ালয়ত ছলিচিটৰ জেনেৰেল তুষাৰ মেহতাই কয় যে বিজয়ৰ এই মন্তব্য ‘দুৰ্ভাগ্যজনক’। তেওঁ ক্ষমা খুজিছে। ইয়াৰ পিছত বিচাৰপীঠৰ পৰ্যবেক্ষণ, “সেই মন্তব্য কেৱল দুৰ্ভাগ্যজনকে নহয়, সেইবোৰ অতি দুৰ্ভাগ্যজনকো। তেওঁৰ কোনো অনুশোচনা নাই।” এই ঘটনাত মধ্যপ্ৰদেশ চৰকাৰ বা বিজয়ৰ পৰা আৰু কোনো শপতনামা গ্ৰহণ নকৰে বুলি মুখ্য ন্যায়াধীশগৰাকীয়ে কয়।
ভাৰতীয় সেনাৰ ‘অপাৰেচন সিন্দুৰ’ অভিযানত জড়িত আছিল কৰ্ণেল কুৰেশ্বী। এই অভিযানৰ খবৰো তেওঁ নিয়মিতভাৱে সংবাদ মাধ্যমৰ মাজলৈ লৈ আহিছিল।
তেওঁৰ সন্দৰ্ভত বিজেপি মন্ত্ৰী বিজয়ে কৈছিল, “যিয়ে আমাৰ মা-কন্যাৰ পৰা সিন্দুৰ মচি দিছে তাৰেই ভগ্নীক ব্যৱহাৰ কৰি আক্ৰমণকাৰীক আমি শাস্তি দিছোঁ। মোদীজীয়ে তেওঁলোকৰ ভগ্নীৰ জৰিয়তে পাঠ শিকাইছে। মোদীজীয়ে এতিয়া তেওঁলোকৰ দৰে ব্যৱহাৰ কৰিব নোৱাৰে। সেইবাবেই তেওঁ তেওঁলোকৰ সম্প্ৰদায়ৰ ভগ্নীক ব্যৱহাৰ কৰি তেওঁলোকক শাস্তি প্ৰদান কৰিছে।”
মন্ত্ৰীগৰাকীৰ এই মন্তব্যই বিতৰ্কৰ সৃষ্টি কৰে। বিশেষ তদন্তকাৰী দলে বিজয়ৰ বিৰুদ্ধে তদন্ত আৰম্ভ কৰিছে। অৱশ্যে উচ্চতম ন্যায়ালয়ে জানুৱাৰী মাহত প্ৰশ্ন উত্থাপন কৰে যে এছআইটিৰ অনুৰোধৰ পিছতো কিয় গোচৰটো পিছুৱাই আছে।
