যৎপৰোনাস্তি চেষ্টা কৰিও সফল হ’ব নোৱাৰিলে। বিশ্বকাপৰ অন্তিম ১৬ত নৰৱেৰ হাতত পৰাস্ত হয় ব্ৰাজিল (Brazil Fifa)। বিশ্বকাপৰ ইতিহাসত প্ৰথমবাৰৰ বাবে পাঁচবাৰৰ চেম্পিয়ন তথা বিশ্ব ফুটবলৰ ‘ক’লা মুকুতা’ হিচাপে খ্যাত পেলেৰ দেশে কোৱাৰ্টাৰৰ ফাইনেলৰ পূৰ্বে বিদায় লয়। ইয়াৰ লগে লগে নেইমাৰৰ সপোনৰো অন্ত পৰে। তেওঁ আন্তঃৰাষ্ট্ৰীয় ফুটবলৰ পৰা অৱসৰ গ্ৰহণ কৰে।
খেলৰ অন্তত নেইমাৰে চকুপানী ধৰি ৰাখিব নোৱাৰিলে। খেলপথাৰত উচুপি উঠে নেইমাৰ। তেওঁৰ সতীৰ্থসকলে তেওঁক সান্ত্বনা দিয়া দেখা যায়। পিছত মিক্সড জ’নত সাংবাদিকৰ সন্মুখত নেইমাৰে অৱসৰৰ কথা ঘোষণা কৰে। তেওঁ কয়, “মই বাৰে বাৰে চেষ্টা কৰি আহিছোঁ। কিন্তু এইবাৰ থমকি ৰোৱাৰ সময়। মই ইয়াৰ পৰাই আৰম্ভ কৰিছিলোঁ, ইয়াতেই শেষ কৰিলোঁ।”
আঘাত থকাৰ পিছতো প্ৰশিক্ষক কাৰ্লো এঞ্চেল’টিয়ে নেইমাৰক বৰ্তমানৰ বিশ্বকাপ দলত ৰাখিছিল। ক্ৰমান্বয়ে সুস্থ হৈ উঠিছিল নেইমাৰ। কিন্তু প্ৰথম চাৰিখন মেচৰ ভিতৰত মাত্ৰ এখন খেলতে তেওঁক বদলি কৰা হৈছিল।
নৰৱেৰ বিৰুদ্ধে মেচখনত এন্সেল’টিয়েও বিকল্প হিচাপে নেইমাৰক খেলপথাৰলৈ আনে। যদিও শেষত পেনাল্টি স্পটৰ পৰা এটা গ’ল দিছিল, তথাপিও নেইমাৰে দলটোক জয়ী কৰিব নোৱাৰিলে। ফলত মেচৰ শেষত তেওঁ নিজৰ আৱেগক নিয়ন্ত্ৰণ কৰিব নোৱাৰিলে।
২০১০ চনত ব্ৰাজিলৰ জাৰ্চি পিন্ধি নেইমাৰে অভিষেক ঘটায়। পৰৱৰ্তী ১৬ বছৰত নেইমাৰে দেশখনৰ জাৰ্চি পিন্ধি ১২৯ খন খেল খেলিছিল। তেওঁ ৮০টা গ’ল কৰে, যিটো ব্ৰাজিলৰ ইতিহাসত সৰ্বাধিক গ’ল। নেইমাৰে ২০১২ চনৰ অলিম্পিকত ব্ৰাজিলক ৰূপৰ পদক, ২০১৬ চনৰ অলিম্পিকত সোণ আৰু ২০১৩ চনত কনফেডাৰেচন কাপত জয়ী হৈছিল।
তেওঁ ব্ৰাজিলৰ হৈ চাৰিবাৰকৈ বিশ্বকাপ খেলিছে। কিন্তু তেওঁ এখনতো জিকিব নোৱাৰিলে। এইবাৰ খেলিব নে নাই সেই লৈ সন্দেহৰ সৃষ্টি হৈছিল। যদিও শেষলৈকে তেওঁ দলত আছিল, তথাপিও শেষৰ সময়খিনি নেইমাৰৰ বাবে ভাল নহ’ল। অৱশেষত কান্দি কান্দি খেলপথাৰ এৰিবলগা হ’ল।
