হৰমুজ প্ৰণালীত তিনিখন বাণিজ্যিক জাহাজৰ ওপৰত হোৱা আক্ৰমণৰ প্ৰতিক্ৰিয়া হিচাপে তেহৰাণৰ বিৰুদ্ধে নতুন আক্ৰমণ আৰম্ভ কৰাৰ কেইঘণ্টামানৰ পিছত, আমেৰিকাৰ ৰাষ্ট্ৰপতি ড’নাল্ড ট্ৰাম্পে (Trump) ইংগিত দিছে যে সংঘৰ্ষ সমাপ্ত কৰাৰ লক্ষ্যৰে ইৰাণৰ (Iran) সৈতে অন্তৱৰ্তীকালীন শান্তি চুক্তি (Interim peace agreement) এতিয়া “বাতিল” বা “সমাপ্ত” (“Canceled” or “Finished”) হৈছে। তুৰ্কীত অনুষ্ঠিত নাটো সন্মিলনত, ক্ষুব্ধ ট্ৰাম্পে ইৰাণৰ নেতাসকলক “নিকৃষ্ট” আৰু “বিকৃত” বুলি অভিহিত কৰিছিল। ট্ৰাম্পে এইটো স্পষ্ট কৰি দিছে যে তেওঁ তেহৰাণৰ সৈতে আৰু কোনো আলোচনা বা সম্পৰ্কত জড়িত হ’ব নিবিচাৰে।
মাত্ৰ তিনি সপ্তাহ আগতে ইৰাণৰ সৈতে হোৱা চুক্তিৰ বিষয়ে সোধাত ট্ৰাম্পে কয়, “মই নাভাবো যে সেই চুক্তিখন আৰু আছে। মই তেওঁলোকৰ সৈতে আৰু কোনো লেনদেন বা সম্পৰ্ক ৰাখিব নিবিচাৰো।
যদিও ট্ৰাম্পৰ মন্তব্যৰ পিছত তেলৰ মূল্য তিনি শতাংশতকৈও অধিক বৃদ্ধি পাইছে, প্ৰকৃত প্ৰভাৱ বা পৰৱৰ্তী পদক্ষেপ কি হ’ব সেয়া এতিয়াও স্পষ্ট নহয়। যুদ্ধৰ সমাপ্তিৰ লক্ষ্যৰে অন্তৱৰ্তীকালীন চুক্তি স্বাক্ষৰ কৰাৰ কেইসপ্তাহমানৰ ভিতৰত আমেৰিকা যুক্তৰাষ্ট্ৰ আৰু ইৰাণে তেওঁলোকৰ ভঙ্গুৰ যুদ্ধবিৰতি বাহাল ৰাখিবলৈ সংগ্ৰাম কৰি আছিল। এই অস্থিৰতাৰ মূল কাৰণ হ’ল হৰমুজ প্ৰণালীৰ ওপৰত ইৰাণৰ নিয়ন্ত্ৰণ প্ৰয়োগ কৰাৰ প্ৰচেষ্টা। বিশ্বৰ শক্তি যোগানৰ প্ৰায় ২০ শতাংশ এই প্ৰণালীৰ মাজেৰে পাৰ হৈ যায়।
আমেৰিকাৰ ৰাষ্ট্ৰপতিয়ে ইৰাণৰ নেতৃত্বক তীব্ৰ সমালোচনা কৰিছে। ট্ৰাম্পে কয়, “তেওঁলোক নিম্ন স্বভাৱৰ লোক। তেওঁলোক এক বিকৃত মানসিকতাৰ মানুহ। তেওঁলোক অতি নিষ্ঠুৰ আৰু হিংস্ৰ। যদি তেওঁলোকৰ ওচৰত পাৰমাণৱিক অস্ত্ৰ আছিল, তেওঁলোকে সেইবোৰ ব্যৱহাৰ কৰিলেহেঁতেন। যদিও ট্ৰাম্পে ইংগিত দিছিল যে দুয়োপক্ষৰ মধ্যস্থতাকাৰীসকলে ইচ্ছা কৰিলে আলোচনা অব্যাহত ৰাখিব পাৰে, তেওঁ প্ৰক্ৰিয়াটোক “সময়ৰ অপচয়” বুলি বিবেচনা কৰিছিল। ৰাষ্ট্ৰপতিয়ে জোৰ দি কৈছিল যে “উন্মাদ” বা “অস্থিৰ” লোকসকলৰ সৈতে আলোচনা কৰাৰ কোনো অৰ্থ নাই। ট্ৰাম্পে কয়, “মই আমাৰ প্ৰতিনিধিসকলৰ সৈতে কথা পাতিম… কিন্তু মোৰ মতে, তেওঁলোকৰ সৈতে কিবা আলোচনা কৰাটো সময়ৰ অপচয়। তেওঁলোক মিছলীয়া।”
