বিশ্বত ক’ৰোনাত আক্ৰান্ত হৈ ৩৮ হাজাৰৰ অধিক লোকৰ মৃত্যু

ASSAM TIMES POST

নিউজ ডেক্স

নোভেল ক’ৰোনাৰ প্রকোপত বিশ্ব জুৰি মৃত্যু সংখ্যা বাঢ়িবলৈ ধৰিছে। মঙলবাৰ পর্যন্ত বিশ্বৰ বিভিন্ন প্রান্তত ৩৮ হাজাৰ ৭৪৩ জন ক’ৰোনাত আক্রান্ত হৈ মৃত্যু হৈছে৷ আক্রান্তৰ সংখ্যা বাঢ়ি ৭ লাখ ৮৬ হাজাৰ ২২৮ জন হৈছেগৈ৷ ইয়াৰ মাজত বহু লোক সুস্থ হৈ উঠিছে৷

 বৰ্তমানে ১৯৫খন দেশত ক’ভিড-১৯ ভাইৰাছৰ বিৰুদ্ধে যুঁজ চলিছে। মার্কিন যুক্তৰাষ্ট্ৰ, ইটালী, স্পেইন, ইৰানৰ দৰে দেশবোৰত ক’ৰোনাৰ প্রকোপ ভয়ংকৰ হৈ পৰিছে। মৃতকৰ সংখ্যাৰ দিশত এই মুহূর্তত ইটালীৰ অৱস্থা ভয়াৱহ হৈ আছে৷ দেশখনত এই পর্যন্ত ১১ হাজাৰ ৫৯১ জন লোকে প্রাণ হেৰুৱাইছে। এই ভাইৰাছত আক্রান্ত হৈ সুস্থ হৈছে এই পৰ্যন্ত ১ লাখ ১ হাজাৰ ৭৩৯ জন লোক৷

মার্কিন যুক্তৰাষ্ট্ৰত এই পর্যন্ত ১ লাখ ৬৪ হাজাৰ ৬২০ লোক নোভেল ক’ৰোনাত আক্রান্ত হৈছে৷ প্রাণ হেৰুৱাইছে ৩ হাজাৰ ১৭০ জনে। সুস্থ হৈ উঠিছে ৫ হাজাৰ ৯৪৩ জন লোক। পৰিস্থিতি বিবেচনা কৰিলে তাত প্রতি চাৰিজনৰ ভিতৰত তিনিজনকে ঘৰত থাকিবলৈ নিৰ্দেশ দিছে৷ মেৰিলেণ্ড, ভার্জিনিয়া আৰু এৰিজোনাইত মানুহক সোমবাৰৰ পৰা ঘৰত থাকিবলৈ নির্দেশ জাৰি কৰিছে৷ । জনসমাগম ৰোধ কৰিবলৈ ফ্লোৰিডা প্রশাসনে একাধিক ব্যৱস্থা গ্ৰহণ কৰিছে৷