প্ৰশাসনৰ বিৰুদ্ধে সৰৱ সাংবাদিক মহল : মুখ্য সচিব, আৰক্ষী সঞ্চালক প্ৰধানলৈ স্মাৰক-পত্ৰ
হোজাই জিলাৰ ডবকাত দণ্ডাধীশৰ উপস্থিতিত চিআৰপিএফৰ দ্বাৰা সাংবাদিক নিৰ্যাতনৰ ঘটনাত সৰৱ হৈ পৰিছে সাংবাদিক মহল ৷ উচিত ন্যায়ৰ দাবীত পৃথকে পৃথকে পাঁচখন স্মাৰক-পত্ৰ প্ৰেৰণ কৰিছে অসম চৰকাৰৰ শীৰ্ষ বিষয়ালৈ ৷ আজি হোজাই জিলাৰ ডবকা ৰাজহ চক্ৰ বিষয়াৰ জৰিয়তে ডবকা, হোজাই, মোৰাঝাৰৰ সাংবাদিকে অসম চৰকাৰৰ মুখ্য সচিব, আৰক্ষী সঞ্চালক প্ৰধান, ৰাজ্যিক তথ্য আৰু জনসংযোগ বিভাগৰ সঞ্চালক, তথ্য আৰু জনসংযোগ বিভাগৰ আয়ুক্ত সচিব আৰু মুখ্যমন্ত্ৰীৰ প্ৰেছ উপদেষ্টা হৃষীকেশ গোস্বামীলৈ এই স্মাৰকপত্ৰ কেইখন প্ৰেৰণ কৰা হয় ৷
উল্লেখ্য যে যোৱা ৪ জুলাইৰ সন্ধিয়া ডবকাত বাতৰি সংগ্ৰহ কৰি থকাৰ সময়তে বৈদ্যুতিন সংবাদ মাধ্যম নিউজ ১৮ অসমৰ সাংবাদিক আব্দুল হাকিম চিআৰপিএফৰ প্ৰহাৰৰ সন্মুখীন হয় ৷ হোজাই শংকৰদেৱনগৰৰ এগৰাকী সহকাৰী আয়ুক্তই লগত লৈ আহিছিল চিআৰপিএফ বাহিনী ৷ ডবকাত ৰাইজে সম্পূৰ্ণ ৰূপে লকডাউন আৰু কাৰফিউ মানি চলাৰ সময়তেই হোজাইৰ এগৰাকী সহকাৰী আয়ুক্তই চিআৰপিএফ বাহিনী লগত লৈ স্থানীয় ৰাইজ, পথচাৰিক জধে-মধে মাৰপিটৰ কৰাৰ খবৰ পাই বাতৰি সংগ্ৰহ কৰাৰ বাবে ডবকা-ডিফু ৰোডলৈ যাওঁতেই চলন্ত বাইকত এজন চিআৰপিএফে আক্ৰমণ কৰে ৷
সেই সময়ত সাংবাদিকগৰাকীয়ে এক ভয়ংকৰ দুৰ্ঘটনাৰ পৰা কথমপি ৰক্ষা পৰে ৷ নিজকে সাংবাদিক বুলি পৰিচয় দিয়াৰ পিছতো চাৰিজন চিআৰপিএফ আৰু সহকাৰী আয়ুক্তগৰাকীয়ে সাংবাদিক গৰাকীক শাৰিৰীক নিৰ্যাতন কৰিছিল । অৱেশ্যে ঘটনাৰ সময়ত ডবকা আৰক্ষী থানাৰ কোনো আৰক্ষীৰ দল নাছিল ৷ জিলাখনৰ এগৰাকী সহকাৰী আয়ুক্তই লগত লৈ ঘূৰি ফুৰা চিআৰপিএফৰ দলৰ দ্বাৰা সাংবাদিকক প্ৰহাৰ কৰা ঘটনাক লৈ ৰাইজৰ লগতে দল সংগঠনৰ মাজতো সৃষ্টি হৈছে তীব্ৰ প্ৰতিক্ৰিয়াৰ ৷
ইতিমধ্যে ঘটনা সংক্ৰান্তত সাংবাদিকগৰাকীয়ে সহাকাৰী আয়ুক্তৰ বিৰুদ্ধে ডবকা থানাত এটা গোচৰ তৰিছে ৷ হোজাই জিলাৰ বিভিন্ন প্ৰেছ ক্লাবে এই ঘটনাক গৰিহনা দি আজি পাঁচখন স্মাৰক-পত্ৰ প্ৰদান কৰি বিহীত ব্যৱস্থা গ্ৰহণৰ দাবী উত্থাপন কৰিছে ৷
উল্লেখ্য যে, হোজাইত সাংবাদিক নিৰ্যাতন কৰাৰ এই ঘটনা নতুন নহয়; একাংশ দুৰ্নীতিপৰায়ণ লোকৰ দুৰ্নীতি উদঙাই দিয়াৰ বাবে সাংবাদিকৰ বিৰুদ্ধে কেতবোৰ ভুৱা গোচৰ ৰুজু কৰাৰ ঘটনাৰ বিৰুদ্ধে প্ৰতিক্ৰিয়া প্ৰকাশ কৰিছে দল-সংগঠনৰ লগতে হোজাইৰ সচেতন মহলে ৷ উল্লেখযোগ্য যে বিগত সাত বছৰৰ পৰা হোজাই জিলাত নাই জনসংযোগ বিষয়া ৷ যাৰ বাবে জিলাখনৰ সাংবাদিকসকলে তথ্য সংগ্ৰহ কৰাত অসুবিধাৰ সন্মুখীন হবলগীয়া হৈছে ৷ সাংবাদিকসকলে যোগাযোগ কৰিবলৈ জিলাখনত জনসংযোগ বিভাগ এটা আছে যদিও ২০১৪ চনৰ পৰা জনসংযোগ বিষয়াৰ পদটো খালী হৈ আছে ৷ জিলা উপায়ুক্তই অতিৰিক্ত উপায়ুক্ত প্ৰশান্ত বৰুৱাক ভাৰপ্ৰাপ্ত জনসংযোগ বিভাগৰ দ্বায়িত্ব দিছে যদিও সাংবাদিকসকলে তেঁওৰ পৰা কোনো সহযোগ নোপোৱাৰ অভিযোগ উঠিছে ৷
জানিব পৰা মতে অতিৰিক্ত উপায়ুক্ত প্ৰশান্ত বৰুৱাই জিলাখনৰ ৰাজহ বিভাগ, দুৰ্যোগ ব্যৱস্থাপনা, প্লেনিং এণ্ড ডেভেলপমেন্ট, এম বি টি চি, গ্ৰামোন্নয়ন, স্বাস্থ্য, এনআৰচি, লোক পিয়ল, গড়কাপ্তানি, কৃষি, জনসংযোগ বিভাগ আদি সহ কেবাটাও গুৰু দায়িত্ব থকাৰ বাবেই জিলাখনৰ সাংবাদিকসকলৰ সৈতে তথ্যতো দূৰৈৰ কথা, পৰিচয় পৰ্যন্ত হ’বলৈয়ো সময় নাই বুলি অভিযোগ উঠিছে ৷ জিলাখনত এজন স্থায়ী জনসংযোগ বিষয়াক নিযুক্তি দিয়াৰ দাবী উত্থাপন কৰিছে সাংবাদিকসকলে ৷
