ডিফু : যি সময়ত চিকিৎসক সকলক ভগৱান বুলি সেৱা কৰা হৈছে ঠিক তেনে সময়ত পাহাৰীয়া জিলাৰ সদৰ চহৰ ডিফুত এজন ইএনটি চিকিৎসকে এগৰাকী মহিলাক চিকিৎসা কৰিবলৈ গৈ মহিলাগৰাকীৰ শালীনতা নষ্ট কৰাৰ দৰে অভিযোগ উত্থাপিত হোৱাত ডিফুত চাঞ্চল্যৰ সৃষ্টি হৈছে ৷
প্ৰাপ্ত খবৰ অনুসৰি চিকিৎসা কৰিবলৈ অহা মহিলা ২৪ বছৰীয়া মহিলা বেমাৰীক শালীনতা হানি কৰে চিকিৎসকজনে ৷
ডিফুৰ ‘অঞ্জলী মেডিকেল হল’ৰ প্ৰাইভেট চেম্বাৰত এই জগণ্য কাণ্ডৰ অভিযোগ উত্থাপন হৈছে ৷ ডিফু চিকিৎসা মহাবিদ্যালয়ৰ ইএনটি বিভাগৰ চিকিৎসক এছ কে দাসৰ বিৰুদ্ধে উত্থাপিত হৈছে এই লজ্জাজনক অভিযোগ ৷
ভুক্তভোগী ডিফু টিচাৰ্ছ ক’লনিৰ বিবাহিতা মহিলাই চিকিৎসকগৰাকীৰ ওচৰত দীৰ্ঘ দিনৰ ডিঙিৰ বেমাৰৰ চিকিৎসা কৰাই আছিল ৷ যোৱা ৭ জুলাইত প্ৰথমবাৰৰ বাবে ব্যক্তিগতভাৱে ‘অঞ্জলী মেডিকেল হল’ত চিকিৎসা কৰিবলৈ যাওঁতে চিকিৎসকগৰাকীয়ে মহিলাগৰাকীৰ সংবেদনশীল স্থানত স্পৰ্শ কৰি শালীনতা নষ্ট কৰিছিল বুলি অভিযোগ কৰে যদিও চিকিৎসাৰ বাবে চিকিৎসকে এনে কৰিছিল বুলি ভাবিছিল মহিলাগৰাকীয়ে ৷ মহিলাগৰাকীক চিকিৎসকজনে ‘আল্ট্ৰা চাউণ্ড’ কৰিবলৈ পৰামৰ্শ দি পুনৰ আহিবলৈ কৈছিল ৷
সেই মৰ্মে আজি সন্ধিয়া পুনৰ মহিলাগৰাকী চিকিৎসকগৰাকীৰ ওচৰত যায় ৷ চিকিৎসকগৰাকীয়ে পুনৰ একে আচৰণ কৰি মহিলাগৰাকীক একেদৰে শালীনতা নষ্ষ্ট কৰে বুলি মহিলাগৰাকীয়ে জনায় ৷ চিকিৎসকগৰাকীয়ে চিকিৎসা কৰা সময়ত কোনো নাৰ্ছ নাছিল ৷ এই সন্দৰ্ভত মহিলাগৰাকীৰ এজাহাৰৰ ভিত্তিত ডিফু থানাত ১৩০/ ২০ নম্বৰত ভাঃদঃবিঃ আইনৰ ৩৫৪ ধাৰাত গোছৰ ৰুজো দি চিকিৎসকগৰাকীক জেৰা অব্যাহত ৰাখিছে৷