ASSAM TIMES POST
ডিফুঃ মৰেল পুলিচৰূপী একাংশ দুৰ্বৃত্তৰ নিকৃষ্ট কাৰ্যত হতাশ আৰু চৰম অপমানত ভূগি অকালতে আত্মহত্যাৰ পথ বাছি ল’লে এগৰাকী কিশোৰীয়ে৷ এইলৈ পাহাৰীয়া জিলা কাৰবি আংলঙত তীব্ৰ চাঞ্চল্যই বিৰাজ কৰিছে৷ প্ৰাপ্ত খবৰ অনুসৰি যোৱা ১৯ আগষ্টত বকলিয়াঘাট থানা এলেকাধীন তিচ’ম গাঁৱৰ এগৰাকী কিশোৰী নিজ বন্ধুৰ সৈতে চিলনীস্থিত বনভোজ থলীলৈ ফুৰিবলৈ যায়৷
উক্ত সময়ত নিজ বন্ধুৰ সৈতে কিশোৰীগৰাকীৰ কিছু অন্তৰংগ মুহূৰ্ত কোনো দূৰ্বৃত্তই গোপনে ভিডিঅ’ কৰি তাৰ দৃশ্যাংশ গ্ৰহণেৰে কিশোৰীগৰাকীৰ বন্ধুক মাৰপিট কৰাৰ লগতে উক্ত ভিডিঅ’ ছ’চিয়েল মিডিয়াত ভাইৰেল কৰে৷ ছ’চিয়েল মিডিয়াৰ যোগেদি দুৰ্বৃত্ত কেইটাৰ এনে কাণ্ডত প্ৰচণ্ড হতাশা আৰু লাজ-অপমানত ভুগি যোৱা ২১ আগষ্টত কিশোৰীগৰাকী নিজ ঘৰতে আত্মহনন কৰে৷
ছ’চিয়েল মিডিয়াত ভাইৰেল হোৱা উক্ত ভিডিঅ’ৰ কথা গম পাই মাঞ্জা থানাৰ ভাৰপ্ৰাপ্ত বিষয়া জিতুমনি ডেকাই নিজাববীয়াকৈ তদন্ত কৰি অৱশেষত আজি দুটা দুৰ্বৃত্তক কৰায়ত্ত কৰিবলৈ সক্ষম হয়৷ ধৃত দুৰ্বৃত্ত কেইটা ক্ৰমে হৰেণছিং টেৰণ আৰু ফ্ৰাঞ্চিছ ইংতি বুলি চিনাক্ত কৰা হৈছে৷ ধৃত দুৰ্বৃত্ত কেইটা বন বিভাগৰ অস্থায়ী কৰ্মচাৰী বুলি জানিব পৰা গৈছে৷ এই সন্দৰ্ভত মাঞ্জা থানাৰ ভাৰপ্ৰাপ্ত বিষয়া জিতুমনি ডেকাই বকলীয়া আৰক্ষী থানাত এক গোচৰ ৰুজো কৰে৷
উল্লেখযোগ্য যে ছ’চিয়েল মিডিয়াৰ অপব্যৱহাৰ কৰা এনে দুৰ্বৃত্তৰ বিৰুদ্ধে নিজাববীয়াৰ প্ৰচেষ্টাৰ বাবে সচেতন মহলে বিষয়াগৰাকীক প্ৰশংসা কৰিছে৷ বৰ্তমান সময়ত সমাজত চলি থকা ম’ৰেল পুলিছৰ এনে অপকৰ্ম বাবে ম’ৰেল পুলিছিং সম্প্ৰতি এক ডাঙৰ বিকাৰ হৈ থিয় দিছে৷ ম’ৰেল পুলিছৰ এনে দুষ্কাৰ্যত মানসিকতাৰ বাবে ভাগি পৰা এগৰাকী অপৈণত কিশোৰীয়ে আত্মহননৰ পথ বাছি লোৱা কাৰ্যই বিশেষ তাৎপৰ্য বহন কৰিছে৷
