নিউজ ডেস্কঃ
ৰাজীৱ গান্ধী খেলৰত্ন বঁটাৰ নাম সলনি কৰাৰ পিছতেই নিজৰ নামৰ ষ্টেডিয়ামক লৈ ছচিয়েল মিডিয়াত সমালোচনাৰ সন্মুখীন হ’ল প্রধানমন্ত্রী নৰেন্দ্র মোদী। শুক্রবাৰে পুৱাতে ৰাজীৱ গান্ধীৰ নামৰ ঠাইত মেজৰ ধ্যানচান্দৰ নামত খেলৰত্ন বঁটা দিয়াৰ কথা ঘোষণা কৰিছিল তেওঁ।
মোদীৰ এই পদক্ষেপক স্বাগতম জনাইছিল নেটিজেনসকলে। খেলা-ধূলা সংক্রান্তীয় কোনো পুৰস্কাৰত ৰাজনৈতিক ব্যক্তিৰ নাম থকা উচিত নহয় বুলি মন্তব্য কৰে বহুতে।
ইয়াৰ পিছতে আক্ৰমণ আৰম্ভ কৰে বিৰোধী দলৰ সদস্যসকলে। আহমদাবাদৰ নৰেন্দ্ৰ মোদী ষ্টেডিয়ামৰ নামক লৈ সৰৱ হয় তেওঁলোক। প্রাক্তন ক্রিকেটাৰ ইৰফান পাঠানে খেলৰত্ন সন্দৰ্ভত প্রধানমন্ত্রীৰ সিদ্ধান্তক সমর্থন কৰি লিখে, ‘এইটো অতি ভাল পদক্ষেপ৷ অৱশ্যে আশাকৰো ভৱিষ্যতে ষ্টেডিয়ামৰ নাম খেলুৱৈসকলৰ নামত কৰা হ’ব।’
ইউটিউবাৰ ধ্রুৱ ৰাথিয়েও টুইট কৰে। দিল্লীৰ অৰুণ জেটলি ষ্টেডিয়ামৰ নাম পৰিৱর্তনৰো দাবী জনায় তেওঁ।
