ষ্টাফ ৰিপ’ৰ্টাৰ
নগাঁও জিলাৰ চামগুৰি সমষ্টিৰ খাটোৱাল আৰক্ষী থানাৰ অন্তৰ্গত কুটায়িনী গেৰুৱামুখত শনিবাৰে নিশা আৰক্ষী আৰু ড্ৰাগছ পেডেলাৰৰ মাজত সংঘৰ্ষৰ সৃষ্টি হয়। এই সংঘৰ্ষত আৰক্ষীৰ গুলিত এজন কুখ্যাত ড্ৰাগছ পেডলাৰ তথা গভাইত চোৰ নিহত হোৱাৰ লগতে আৰক্ষীৰ দুজনকৈ লোক গুৰুতৰভাবে আহত হৈ চিকিৎসাধীন হৈ আছে। এই ঘটনাই গেৰুৱামুখ অঞ্চলত তীব্ৰ উত্তেজনা সৃষ্টি কৰিছে ৷
প্ৰাপ্ত খবৰ মতে, খাটোৱাল আৰক্ষী থানাৰ ভাৰপ্ৰাপ্ত আৰক্ষী বিষয়া অলক দত্ত গুপ্তাৰ নেতৃত্বত নিশা প্ৰায় ১২-১০ বজাত গেৰুৱামুখত ড্ৰাগছৰ বিৰুদ্ধে অভিযান চলাইছিল ৷ আৰক্ষীয়ে ড্ৰাগছৰ বিৰুদ্ধে অভিযান চলোৱাৰ সময়ত খাইৰুল ইছলামৰ লগত আন ৩ জন সহযোগীও আছিল বুলি আৰক্ষী সূত্ৰত প্ৰকাশ। আৰক্ষীৰ অভিযানৰ উমান পাই কুখ্যাত ড্ৰাগছ পেডেলাৰ খাইৰুলে খাটোৱাল আৰক্ষী থানাৰ ভাৰপ্ৰাপ্ত আৰক্ষী বিষয়া অলক দত্ত গুপ্তাক খুকুৰীৰে ডিঙি ৰেপি হত্যাৰ চেষ্টা চলায়। ভাৰপ্ৰাপ্ত আৰক্ষী বিষয়াগৰাকীক চোকা অস্ত্ৰৰে আক্ৰমণ কৰি পলায়ন কৰিবলৈ চেষ্টা কৰা খাইৰুলক অভিযানত যোৱা আৰক্ষীৰ অস্থায়ী গাড়ী চালক উৎপল বৰুৱা নামৰ যুৱকজনে গবা মাৰি ধৰাত আহত হ’বলগীয়া হয় ৷
প্ৰতিৰক্ষাৰ বাবে ভাৰপ্ৰাপ্ত আৰক্ষী বিষয়াজনে গুলি চলোৱাত খাইৰুল থিতাতে নিহত হয় আৰু আন তিনি সহযোগী পলায়ন কৰে বুলি নগাঁৱৰ আৰক্ষী অধীক্ষক আনন্দ মিশ্ৰই সংবাদ মাধ্যমৰ আগত প্ৰকাশ কৰে। আৰক্ষী বিষয়াজনে গুলি চলোৱাত গাড়ী চালক বৰুৱা আহত হ’বলগীয়া হয় বুলি আৰক্ষী সূত্ৰত প্ৰকাশ। চোকা অস্ত্ৰৰ আক্ৰমণত হাত আৰু ডিঙিত গুৰুতৰভাৱে আঘাত প্ৰাপ্ত হোৱা ভাৰপ্ৰাপ্ত আৰক্ষী বিষয়া অলক দত্ত গুপ্তাৰ লগতে ভৰিত আঘাত পোৱা গাড়ী চালকজনক ততাতৈয়াকৈ নগাঁও অসামৰিক চিকিৎসালয়ত ভৰ্তি কৰোৱা হয় ৷
আনহাতে আৰক্ষীৰ গুলিত থিতাতে নিহত হোৱা খাইৰুল ইছলামৰ মৃতদেহটো মৰণোত্তৰ পৰীক্ষাৰ বাবে নগাঁও অসামৰিক চিকিৎসালয়লৈ প্ৰেৰণ কৰে ৷ যোৱা নিশা আৰক্ষীৰ এনকাউণ্টাৰত নিহত খাইৰুলৰ পৰিয়াল আৰু স্থানীয় শতাধিক লোকে খাটোৱাল আৰক্ষী থানাত উপস্থিত হৈ কোনো অপ্ৰীতিকৰ পৰিস্থিতি সৃষ্টি কৰিব পাৰে বুলি আৰক্ষী থানাখনত আৰক্ষী আৰু অৰ্ধ-সামৰিক বাহিনীৰ জোৱান মোতায়েন কৰা হৈছে।উল্লেখ্য যে পূৰ্বতে আনছক্ৰিমৰ ব্যৱসায়ৰ লগত জড়িত খাইৰুল ইছলামে দীৰ্ঘদিন ধৰি অঞ্চলটোত ছাগলী চোৰকে ধৰি বিভিন্ন ধৰণৰ চুৰি কাৰ্যৰে ত্ৰাসৰ সৃষ্টি কৰি আহিছিল ৷
আনহাতে আৰক্ষীৰ গুলিত নিহত হোৱা লোকজনৰ মৃতদেহটো মৰণোত্তৰ পৰীক্ষা অন্তত আৰক্ষীয়ে পৰিয়ালৰ লোকৰ হাতত মৃতদেহটো চমজাই দিয়াৰ ব্যৱস্থা গ্ৰহন কৰে যদিও পৰিয়ালৰ লোকে বাতৰি লিখাৰ সময়লৈকে মৃতদেহটো চমজি লোৱা নাই বুলি জানিব পৰা গৈছে ৷
