ASSAM TIMES POST
বিশেষ প্ৰতিবেদন
কামৰুল খান, ডিফুঃ কাৰ্বি আংলং আৰু ডিমা হাচাওৰ যুৱক-যুৱতীসকলৰ মাজত স্ব-নিয়োজনৰ লক্ষ্যকে প্ৰমুখ্য কৰি কৃষি আৰু উদ্যান শস্যৰ ক্ষেত্ৰখনত সহযোগিতা আৰু সম্পৰ্ক বিষয়ক এখন বুজাবুজিৰ চুক্তি (এমঅ’ইউ)ত শেহতীয়াকৈ স্বাক্ষৰ হয় কাৰ্বি আংলং, ডিমা হাচাও স্বায়ত্তশাসিত পৰিষদ আৰু থাইলেণ্ডৰ পাথুম থানি প্ৰভিন্সৰ গৰ্ভনৰৰ মাজত।
ইয়াৰ জৰিয়তে জিলা দুখনত ফল আৰু শাক-পাচলিৰ জলবায়ু স্থিতিস্থাপক কৃষি (Climate Resilient Agriculture), শস্য চপোৱাৰ পৰৱৰ্তী প্ৰযুক্তি (Post Harvest Technology) ব্যৱহাৰৰ গতি ত্বৰান্বিত হ’ব বুলি আশা কৰা হৈছে।
এই চুক্তিখন স্বাক্ষৰৰ সময়ত উপস্থিত থাকে পাথুম থানি প্ৰভিন্সৰ গৰ্ভনৰ ডঃ পিনজী বুনলাৰ্ট, ডেপুটি গৰ্ভনৰ চাঠিপ ৰুজানশ্ৰী, কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং, অসম চৰকাৰৰ পাৰ্বত্য এলেকা উন্নয়ন মন্ত্ৰী চুম ৰংহাং, স্বায়ত্তশাসিত জিলা সমষ্টিৰ সাংসদ হৰেণসিং বে’, উপাধ্যক্ষ ঋতেশ ইংতী তথা ডিমা হাচাও স্বায়ত্তশাসিত পৰিষদৰ ৯ জনকৈ কাৰ্যবাহী সদস্য আৰু স্বায়ত্তশাসিত পৰিষদৰ সদস্য উপস্থিত থাকে।
তদুপৰি এওঁলোকে থাইলেণ্ড চৰকাৰৰ সৈতে কৃষি আৰু উদ্যোগ বিষয়ত এক বিশেষ কাৰ্যক্ৰমটো ভাগ লয়।
