ASSAM TIMES POST
ডিফুঃ জনসাধাৰণে বিশুদ্ধ আৰু সুৰক্ষিত খোৱা পানীৰ সুবিধা লাভ কৰাৰ উদ্দেশ্যৰে মঙলবাৰে ডিফুস্থিত ভক্তি বিকাশ কেন্দ্ৰ (আৰ্ট অৱ লিভিং আশ্ৰম)ত এটা ফ্ল’ৰাইড নিষ্কাষণ প্ৰকল্প উদ্বোধন কৰে স্বায়ত্তশাসিত জিলাৰ সাংসদ হৰেণ সিং বে’য়ে। ইয়াত উপস্থিত থাকে কাৰ্বি আংলং স্বায়ত্তশাসিত পৰিষদৰ কাৰ্যবাহী সদস্য প্ৰদীপ ৰংপী, তেজপুৰ বিশ্ববিদ্যালয়ৰ ৰসায়ন বিজ্ঞান বিভাগৰ অধ্যাপক ৰবীন কুমাৰ দত্ত, আৰ্ট অৱ লিভিঙৰ গুৰুজী বিষ্ণু প্ৰসাদ আদি।
আৰ্ট অৱ লিভিঙে ৰূপায়ণ কৰা এই প্ৰকল্পটোত পুঁজি যোগান ধৰে কাৰ্বি আংলং স্বায়ত্তশাসিত পৰিষদে। এই প্ৰকল্পই জিলাখনৰ বাঘপানী, ডকমকা, ডবকা, লাংহিন, হাওৰাঘাট আৰু ডেনগাঁও আদিৰ দৰে ফ্ল’ৰাইড কৱলিত এলেকাৰ জনসাধাৰণক উপকৃত কৰিব। প্ৰকল্পটোৰ জৰিয়তে প্ৰথম পৰ্যায়ত ১৫০০ পৰিয়ালক সামৰি লোৱাৰ সমান্তৰালভাৱে ২ আৰু ৩য় পৰ্যায়ত ২৫০০ পৰিয়ালক সামৰি লোৱা হৈছে। উদ্বোধন কৰি নিজৰ ভাষণ প্ৰসংগত সাংসদজনে কয়, ‘আমি একবিংশ শতিকাৰ পৃথিৱীখনত বসবাস কৰা সত্বেও ফ্ল’ৰাইডযুক্ত পানী যে আমি সেৱন কৰি আহিছো তালৈ যেন ভ্ৰুক্ষেপ নকৰো।’
তেওঁ লগতে কয় যে ফ্ল’ৰাইডযুক্ত পানী সেৱনৰ ফলত মানৱ দেহত গুৰুতৰ প্ৰভাৱ পৰে। ইয়াৰবাবে দাঁত আৰু কংকালত ফ্লৰ’ছিছে বাঁহ লয়। যিয়ে নেকি হাঁড়, দাঁতত বিসংগতিৰ সৃষ্টি কৰাৰ লগতে থাইৰয়ড গ্ৰন্থিৰ ওপৰত নেতিবাচক প্ৰভাৱ পেলাব পাৰে। বে’য়ে ‘ড্ৰিংক ছেফ ৱাটাৰ এণ্ড লিভ এ হেল্থী লাইফ’ বুলি কৈ তেওঁৰ ভাষণৰ সামৰণি মাৰে।
