উত্তৰ প্রদেশত ঘৰৰ ভিতৰৰ পৰা উদ্ধাৰ হৈছে তিনি শিশুসহ একেই পৰিয়ালৰে পাঁচজনৰ মৃতদেহ। শনিবাৰে আৰক্ষীয়ে জনাইছে, ঘটনাটি শুক্রবাৰৰ নিশা নবাবগঞ্জ থানাৰ খাগলপুৰ গাঁৱৰ।
নতুনকৈ ৰাজ্যত ক্ষমতালৈ অহাৰ পিছত এই ঘটনাত যোগী চৰকাৰৰ দিশে আহুলি টোঁৱাবলৈ আৰম্ভ কৰিছে বিৰোধীয়ে। আৰক্ষীৰ দাবী, ঘটনাটি আত্মহত্যাৰ।
আৰক্ষী সূত্র মতে, শনিবাৰে পুৱা ৭ বজাত ঘটনাৰ খবৰ আহে। প্রয়াগৰাজৰ আৰক্ষী অধীক্ষক অভিষেক আগৰৱালাই জনায়, ফৰেন্সিক দল আৰু আৰক্ষীয়ে কুকুৰ লৈ ঘটনাস্থলীত উপস্থিত হয়। ঘৰত মৃত অৱস্থাত পোৱা যায় ৰাহুল (৪২), তেওঁৰ পত্নী প্রীতি (৩৮) আৰু তেওঁলোকৰ তিনি জীয়ৰী— মাহি (১৫), পিহু (১৩) আৰু কুহুক (১১)।
আৰক্ষীয়ে জনোৱা মতে, ৰাহুলৰ মৃতদেহ ঘৰৰ ছাদৰ পৰা ওলমি আছিল। অন্যকেইজনৰ ডিঙিত চোকা অস্ত্ৰৰে আঘাতৰ ক্ষত আছে। শনিবাৰে অহা ৰাহুলৰ পোষ্টমৰ্টেমৰ ৰিপোর্ট মতে আৰক্ষীয়ে তাত আত্মহত্যাৰেই তত্ত্ব লাভ কৰা বুলি প্ৰকাশ।
ঘটনাটি তদন্তৰ বাবে সাতটা তদন্তকাৰী দল গঠন কৰা হৈছে। তদন্তকাৰীসকলৰ দাবী, ৰাহুলৰ ভনীয়েক আৰু খুড়শালিয়েকৰ পৰা জানিব পৰা মতে তেওঁ কিছু দিন ধৰি শহুৰৰ ঘৰৰ সৈতে বিবাদত জড়িত হৈ পৰিছিল।
ইফালে সমাজবাদী পার্টিৰ সভাপতি অখিলেশ যাদৱে এই ঘটনাৰ বাবে বিজেপি নেতৃত্বাধীন উত্তৰ প্রদেশ চৰকাৰক আক্রমণ কৰি কৈছে, ৰাজ্যখন অপৰাধত নিমজ্জিত হৈছে।
এটি খবৰৰ স্ক্রিনশ্বট শ্বেয়াৰ কৰি তেওঁ হিন্দীতে টুইট কৰিছে, ‘‘বিজেপি চৰকাৰ ২.০ৰ আমোলত উত্তৰ প্রদেশ অপৰাধত ডুবি গৈছে।
