দুবছৰীয়া এটি শিশুসহ একে পৰিয়ালৰ পাঁচজনক ঘপিয়াই হত্যা দুষ্কৃতিকাৰীৰ। ঘটনাটি ঘটিছে উত্তৰ প্রদেশৰ প্রয়াগৰাজৰ থৰবই থানাৰ অন্তর্গত খেবৰাজপুৰত। আৰক্ষীয়ে জনাইছে, দুষ্কৃতিকাৰীয়ে এক প্রৌঢ় দম্পতি, তেওঁলোকৰ জীয়ৰী, বোৱাৰী আৰু নাতিনীক হত্যা কৰিছে।
মৃতসকল হৈছে ৰামকুমাৰ যাদৱ (৫৫), তেওঁৰ পত্নী কুসুম দেৱী (৫২), জীয়ৰী মনীষা (২৫), বোৱাৰী সবিতা (২৭) আৰু নাতিনী মীনাক্ষী (২)।
প্রত্যক্ষদর্শীয়ে জনোৱা মতে, শনিবাৰে পুৱা ৰামকুমাৰৰ ঘৰৰ পৰা প্রচণ্ড ধোঁৱা ওলোৱা দেখে তেওঁলোকে। ঘৰত জুইলগাৰ আশঙ্কা কৰি কেইজনমান লোক ৰামকুমাৰৰ ঘৰত সোমাওঁতেই আতংকিত হৈ উঠে। তেওঁলোকে দেখে মজিয়াত পৰি আছে পাঁচজনৰ ৰক্তাক্ত মৃতদেহ।
এটি কোঠাত দাউদাউকৈ জুই জ্বলিছিল। ঘৰৰেই এটা কোণৰ পৰা ৰামকুমাৰৰ পাঁচ বছৰীয়া নাতিনীক উদ্ধাৰ কৰে স্থানীয় লোকসকলে। তেওঁৰ চকুৱে-মুখে তেতিয়াও আতঙ্কৰ চাপ স্পষ্ট।
আৰক্ষী বাহিনীয়ে গৈ ঘৰটোৰ পৰা পাঁচজনৰ মৃতদেহ উদ্ধাৰ কৰি পোষ্টমৰ্টেমৰ বাবে প্ৰেৰণ কৰিছে। হত্যাকাৰীৰ সন্ধান কৰিবলৈ এটি বিশেষ দল গঠন কৰিছে আৰক্ষীয়ে। অপৰাধীক সোনকালে গ্রেপ্তাৰৰ দাবী জনাইছে অঞ্চলটোৰ লোকসকলে।
আৰক্ষীয়ে জনোৱা মতে চোকা অস্ত্ৰৰে নৃশংসভাবে হত্যা কৰা হৈছে পাঁচজনকে। কিন্তু কিয় হত্যা কৰা হ’ল, কোনেইবা হত্যা কৰিলে সেই উত্তৰৰ সন্ধানত আৰক্ষীয়ে কাম আৰম্ভ কৰিছে। একে সময়তে প্রশ্ন উঠিছে, ৰামকুমাৰৰ পাঁচ বছৰীয়া নাতিনীক কিয় এৰি দিলে দুষ্কৃতিকাৰীয়ে। পৰিচিত কোনো উক্ত ঘটনাৰ সৈতে জড়িত আছে নেকি তাকো চাইছে আৰক্ষীয়ে।
