ASSAM TIMES POST
অজন্তা তালুকদাৰ, বোকাখাতঃ ইউৰোপ মহাদেশৰ বেলজিয়ামৰ নামূৰ চহৰত ১১ অক্টোবৰৰ পৰা ২০ অক্টোবৰলৈ অনুষ্ঠিত আন্তঃৰাষ্ট্ৰীয় মহোৎসৱত (Festival International Nature Namur, 2019)ত অসমৰ “এম্পটিকাপ ফিল্মছ”ৰ বেনাৰত নিৰ্মিত প্ৰথম চুটি ছবি The Man Who ‘Speaks’ Nature, Professional Films Competition Categoryত শ্ৰেষ্ঠ চুটি ছবি হিচাপে নিৰ্বাচিত হৈছে৷
১৯৯৫ চনৰ পৰা ইউৰোপ মহাদেশৰ বেলজিয়ামৰ নামূৰত অনুষ্ঠিত এই প্ৰকৃতি বিষয়ক মহোৎসৱৰ লগত সংগতি ৰাখি তিনিটা শাখাত অনুষ্ঠিত প্ৰতিযোগিতাত ৮২ দেশৰ ৭৭৪ খন ছবিয়ে Professional Fims Competition Categoryত অংশগ্ৰহণ কৰিছিল ৷ “Professional Films Competition Category” ত অসমৰ ধৃতিমান কাকতি আৰু ৰক্তিম হাজৰিকাৰ কাজিৰঙা বচা গাওঁ নিবাসী, পৰিবেশ কৰ্মী মনোজ গগৈৰ প্ৰকৃতি সংৰক্ষণ বিষয়ক কৰ্মৰাজিৰ ওপৰত আধাৰিত ইতিমধ্যে বহূলভাবে সমাদৃত আৰু পুৰষ্কৃত চুটি ছবি “ডি মেন হো স্পীকছ নেচাৰ”ক বিশ্বৰ ৪২ ছবিৰ ভিতৰত শ্ৰেষ্ঠ চুটি ছবি হিচাপে নিৰ্বাচিত কৰে৷
নামূৰৰ এচিনাপ’লিচ ম’ভি থিয়েটাৰত ১৮ অক্টোবৰত অসমৰ পৰা অংশগ্ৰহণ কৰা ছবিখন প্ৰদৰ্শন কৰা হয় আৰু ১৯ অক্টোবৰৰ নিশা নামূৰত অনুষ্ঠিত জাকজমকীয়া বঁটা বিতৰণি অনুষ্ঠানত এই বঁটা প্ৰদান কৰা হয়৷ উল্লেখ্য যে বেলজিয়ামত অনুষ্ঠিত এই মহোৎসৱ ১৯৯৫ চনৰ পৰা একেৰাহে অনুষ্ঠিত হৈ আহিছে আৰু পৃথিৱীখনৰ পৰিবেশ সচেতনতা তথা সজাগতাৰ বাবে পালিত হৈছে৷ বেলজিয়ামৰ এই মহোৎসৱখন ইউৰোপত অনুষ্ঠিত এনেধৰণৰ মহোৎসৱ সমূহৰ শীৰ্ষ পাচখন মহোৎসৱৰ অন্যতম বুলি গণ্য হৈছে৷
আন্তঃৰাষ্ট্ৰীয় পুৰস্কাৰ বিজয়ী উক্ত সংক্ষিপ্ত তথ্যচিত্ৰখনে অসমস্থিত কাজিৰঙাৰ এজন স্ব-নিৰ্ভৰ সংৰক্ষণবাদী মনোজ গগৈৰ জীৱন বৃত্তান্ত দাঙি ধৰিছে, যিয়ে নিজৰ সমগ্ৰ জীৱন বিভিন্ন প্ৰজাতিৰ বন্যপ্ৰাণীৰ উদ্ধাৰ তথা পুনৰ্বাসত উচৰ্গা কৰিছে।
এই ছবিখনে ইতিমধ্যেই সমগ্ৰ দেশৰে প্ৰকৃতি সংৰক্ষণৰ প্ৰতি সজাগ ব্যক্তি তথা অনুষ্ঠানৰ দৃষ্টি আকৰ্ষণ কৰিব পাৰিছে আৰু দেশ বিদেশৰ কেইবাটাও ছবি মহোৎসৱত প্ৰদৰ্শণৰ বাবে মনোনীত হৈছে ৷ অলপতে ইউৰোপৰ হাংগেৰীৰ গডল’ চহৰত অনুষ্ঠিত আন্তঃৰাষ্ট্ৰীয় প্ৰকৃতি বিষয়ক চুটি ছবি প্ৰতিযোগিতাত “International Film Review Documentaries – short films, videos, independent short films” বিভাগত শ্ৰেষ্ঠ ছবি হিচাপে বিবেচিত হৈছিল৷
অসমৰ এই চুটি ছবিখনে সৰ্বভাৰতীয় স্বীকৃতি হিচাপে ষষ্ঠ ব্ৰহ্মপুত্ৰভেলী ফিল্ম ফেষ্টিভেল, ২০১৮ ত দ্বিতীয় শ্ৰেষ্ঠ বঁটা লাভ কৰে৷ তদুপৰি, সৰ্বভাৰতীয় ফিল্ম ক্ৰিটিক গিল্ডে। (Film Critic Guild of India) প্ৰথমবাৰৰ বাবে আয়োজন কৰা সৰ্বভাৰতীয় চুটি ছবি প্ৰতিযোগিতা “Critic Choice Short Film Awards” ( CCSFA) ৰ বাবে তিনিটা শাখাত মনোনয়ন (নমিনেচন) লাভ কৰিছিল৷ তথ্যচিত্ৰখনে ইয়াৰ লগতে বিশ্বব্যাপী বিভিন্ন চলচ্চিত্ৰ সমাৰোহৰ চৰকাৰী বাছনিত অন্তৰ্ভুক্ত হোৱাৰ সুবিধা লাভ কৰে।
সৰ্বসাধাৰণ সংৰক্ষণবাদী মনোজ গগৈৰ ওপৰত আধাৰিত ছবিখনৰ নিৰ্দেশক ২০ বছৰীয়া ধৃতিমান কাকতি হিমাছল প্ৰদেশৰ চিমলাত গণসংযোগ আৰু সাংবাদিকতা পাঠ্যক্ৰমত চূড়ান্ত বৰ্ষৰ ছাত্ৰ আৰু ক্ৰমে পৰিকল্পনা, চিনেমাট’গ্ৰাফী আৰু সম্পাদনাৰ দায়িত্বত থকা ২১ বছৰীয়া ৰক্তিম হাজৰিকা কটন বিশ্ববিদ্যালয়ৰ পৰা বিচিএ (BCA)ৰ স্নাতক৷ উভয়ে বোকাখাতৰ অধিবাসী। ছবিখনৰ বিতৰণ, লিখিত সংলাপ আৰু আন্তঃৰাষ্ট্ৰীয় প্ৰচাৰ আৰু ছাবটাইটলৰ দায়িত্বত থকা যোৰহাটৰ ২২ বছৰীয়া প্ৰৱাল বৰা এজন শ্ৰেষ্ঠ শব্যযন্ত্ৰী৷
