কাৰবি আংলং স্বায়ত্তশাসিত পৰিষদৰ নিৰ্বাচনলৈ মাত্ৰ এক সপ্তাহ দিন বাকী থকাৰ সময়তে পৰিষদখন বিভিন্ন জাতি-জনগোষ্ঠীৰ সংমিশ্ৰণ থকা অন্যতম ধনশিৰিত দল ত্যাগৰ এক ঘটনাই বিজেপিত প্ৰতিক্ৰিয়াৰ সৃষ্টি হৈছে ৷ আজি ধনশিৰি পৰিষদীয় সমষ্টি এলেকাৰ মাঞ্জাস্থিত বিজেপি কাৰ্যালয়ত ধনশিৰি মণ্ডল বিজেপিয়ে এক সংবাদমেলৰ আয়োজন কৰি এই সন্দৰ্ভত তেওঁলোকৰ স্থিতি স্পষ্ট কৰে ৷
সংবাদমেলত সদৰি কৰা অনুসৰি বিজেপিৰ ধনশিৰিৰ মণ্ডল বিজেপিৰ উপসভাপতি অৰুণ দত্তই কালি বিজেপি দল ত্যাগ কৰি ধনশিৰি পৰিষদীয় সমষ্টিৰ নিৰ্দলীয় প্ৰাৰ্থী নিছ’ তেৰাংপীৰ দলত যোগদান কৰি বিজেপি দলৰ বিৰুদ্ধে কেতবোৰ বিষ্ফোৰক অভিযোগ উত্থাপন কৰিছে, সেয়ে তেওঁক বিজেপি দলৰ পৰা বহিষ্কাৰ কৰা হৈছে বুলি ধনশিৰি মণ্ডল বিজেপিৰ সভাপতি থমাছ লাক্ৰাই জানিবলৈ দিছে ৷
সংবাদমেলত লাক্ৰাই জনোৱা অনুসৰি অৰুণ দত্তই তেওঁৰ লগত থকা সমষ্টিটোৰ সকলো জাতি-জনগোষ্টী অৰুণ দত্তৰ লগত থকা বুলি কোৱা কথা সম্পূৰ্ণ মিছা ৷ তেওঁ জনোৱা মতে সমষ্টিটোৰ সকলো জাতি-জনগোষ্ঠী বিজেপি দলত অক্ষত হৈ আছে আৰু বিজেপি প্ৰাৰ্থী তিলোত্তমা হাঞ্চুক বিজয়ী কৰোৱাৰ বাবে দৃঢ় প্ৰতিজ্ঞ ৷
অৰুণ দত্তই অভিযোগ কৰা অনুসৰি বিজেপি প্ৰাৰ্থী গৰাকী গুৱাহাটীত থকা মানুহ সেয়ে তেওঁক ভোট দিব নালাগে, লগতে বিজেপি ধনশিৰি অবিচি মৰ্চাৰ সভাপতি বিমল সিনহাই কোনোবা মহিলাৰ পৰা বিশ হাজাৰ টকা লোৱাৰো অভিযোগ তুলিছে ৷
এই সমূহ অঙিযোগ মিছা আৰু ষড়যন্ৰ মূলক বুলি আখ্যা দিয়ে মণ্ডল বিজেপিৰ অবিচি মৰ্চাৰ সভাপতি বিমল সিনহা, মণ্ডল বিজেপিৰ সভাপতি থমাছ লাক্ৰা আৰু জিলা বিজেপিৰ কাৰ্যবাহ সদস্য কৃষ্ণ ভট্টৰায়ে ৷ অৰুণ দত্তই কৰা অভিযোগ অনুসৰি বিমল সিনহাই টকা লোৱাৰ কথা প্ৰমাণ কৰিব নোৱাৰিলে তেওঁৰ বিৰুদ্ধে আইনী ব্যৱস্থা গ্ৰহণ কৰা হব ৷
