ছিডনীত অধ্যয়ন কৰি থকা এগৰাকী ভাৰতীয় ছাত্ৰক ১১ বাৰকৈ ছুৰীৰে আঘাত কৰা হয়। গুৰুতৰভাৱে আহত উত্তৰ প্ৰদেশৰ যুৱকজনক চিকিৎসালয়ত ভৰ্তি কৰোৱা হৈছে। বৰ্ণবাদৰ বলি হোৱা বুলি পৰিয়ালৰ অভিযোগ। অষ্ট্ৰেলিয়াত থকা তেওঁলোকৰ পুত্ৰৰ ওচৰলৈ যাবৰ বাবে ভিছাৰ ব্যৱস্থা ক্ষিপ্ৰ কৰাৰ বাবে ভাৰতৰ বৈদেশিক পৰিক্ৰমা মন্ত্ৰণালয়ক আবেদন জনাইছে পৰিয়ালটোৱে।
আহত ছাত্ৰজনৰ নাম শুভম গাৰ্গ। আই আই টি মাদ্ৰাজৰ স্নাতক এইগৰাকী ছাত্ৰ ১ ছেপ্টেম্বৰত অষ্ট্ৰেলিয়াৰ ছিডনীলৈ গৈছিল। তাত ২৮ বছৰীয়া শুভমে নিউ ছাউথ ৱেলছ বিশ্ববিদ্যালয়ত পি এইচ ডি কৰি আছে। তেওঁৰ পৰিয়াল উত্তৰ প্ৰদেশৰ আগ্ৰাত থাকে।
৬ অক্টোবৰৰ নিশা এটিএমৰ পৰা উভতি আহি আছিল তেওঁ। তাৰ পিছত এজন যুৱকে তেওঁৰ ওপৰত আক্ৰমণ চলাই ধনদাবী কৰে। অভিযুক্তৰ হাতত এখন দা আছিল। শুভমে টকা দিবলৈ অমান্তি হোৱাত যুৱকজনে তেওঁৰ পেট আৰু বুকুত ছুৰীৰে আঘাত কৰি পলায়ন কৰে।
শুভমে কেনেবাকৈ ওচৰৰ ঘৰ এটালৈ গৈ সহায় বিচাৰে। তাৰ পৰাই তেওঁক চিকিৎসালয়ত ভৰ্তি কৰোৱা হয়। জানিব পৰা মতে, শুভমৰ পেট আৰু বুকুত গুৰুতৰভাৱে আঘাত পাইছে। শুভমৰ পিতৃ ৰমনিৱস গাৰ্গে কয়, “কেনেবাকৈ তেওঁৰ জীৱন ৰক্ষা পৰিল। ৮ অক্টোবৰত তেওঁৰ পৰা ফোন নাপালোঁ। ইয়াৰ পিছত মই তেওঁৰ বন্ধুজনক ফোন কৰি সকলো গম পালোঁ। ১১ ঘণ্টা ধৰি পেটৰ অস্ত্ৰোপচাৰ কৰা হৈছিল। মোৰ ল’ৰাৰ চিকিৎসাৰ বাবে ভাৰত চৰকাৰৰ পৰা সহায় বিচাৰিছো। মোৰ সৰু লʼৰাটোক অতি সোনকালে অষ্ট্ৰেলিয়ালৈ যাবলৈ ভিছাৰ ব্যৱস্থা কৰিবলৈ অনুৰোধ কৰিছোঁ।”
উল্লেখ্য, শুভমক আক্ৰমণ কৰাৰ অভিযোগত ছিডনীত গ্ৰেপ্তাৰ কৰা হৈছে ২৭ বছৰীয়া এজন যুৱকক। খবৰ অনুসৰি, শুভমে অভিযুক্তক চিনি নাপালে। এটা সূত্ৰই দাবী কৰিছে যে বৰ্ণবাদৰ বাবেই এই আক্ৰমণৰ কোনো প্ৰমাণ পোৱা নাই। শুভমৰ ভগ্নী কাব্য গাৰ্গে টুইট কৰি সমগ্ৰ ঘটনাটোত ভাৰত চৰকাৰৰ সহায় বিচাৰে। প্ৰধানমন্ত্ৰী কাৰ্যালয়ৰ বৈদেশিক পৰিক্ৰমা মন্ত্ৰী এছ জয়শংকৰে এই টুইটত উত্তৰ প্ৰদেশৰ মুখ্যমন্ত্ৰী যোগী আদিত্যনাথকো টেগ কৰে। অষ্ট্ৰেলিয়াৰ উচ্চ আয়োগৰ মুখপাত্ৰই জনোৱা মতে, ছিডনীত থকা ভাৰতীয় কনছুলেটে যুৱকজনক সহায় কৰিছে। আহত পৰিয়ালৰ সদস্যসকলৰ বাবে ভিছাৰ ব্যৱস্থা কৰিছে অষ্ট্ৰেলিয়াৰ উচ্চায়ুক্তই।
