বিজেপি (BJP) চিৰদিনৰ বাবে ক্ষমতাত থাকিব আৰু কংগ্ৰেছ (Congress) চিৰদিনৰ বাবে দেশৰ পৰা বিদায় লৈছে বুলি কৰা ধাৰণাটো হাস্যকৰ। সোমবাৰে সন্ধিয়া লণ্ডন (London)ত অনুষ্ঠিত এক অনুষ্ঠানত অংশগ্ৰহণ কৰি এই মন্তব্য কৰে কংগ্ৰেছৰ সাংসদ ৰাহুল গান্ধী (Rahul Gandhi)য়ে। আজিৰ দিনটোত কংগ্ৰেছ নেতৃত্বাধীন ইউনাইটেড প্ৰগ্ৰেছিভ এলায়েন্সৰ ব্যৰ্থতাৰ বিষয়েও ৰাহুলে মুকলিকৈ কয়। সম্প্ৰতি ব্ৰিটেইন ভ্ৰমণত আছে কংগ্ৰেছ নেতাগৰাকী। সেই ভ্ৰমণৰ সময়ত তেওঁ সোমবাৰে এই অনুষ্ঠানত অংশগ্ৰহণ কৰিছিল।
ৰাহুলে কয়, “বিজেপি ১০ বছৰ ক্ষমতাত থকাৰ আগতে কংগ্ৰেছ ১০ বছৰ ক্ষমতাত আছিল। বিজেপিয়ে বিশ্বাস কৰি ভালপায় যে তেওঁলোক চিৰদিনৰ বাবে ক্ষমতাত থাকিব। তেনেকৈ ভবাটো ভুল। আৰু যিসকলে কংগ্ৰেছৰ সময় শেষ বুলি ভাবে তেওঁলোকক মই কʼম যে আপোনালোকৰ ধাৰণাটোও হাস্যকৰ।”
ৰাহুলে লগতে কয় যে স্বাধীনতাৰ পৰা বৰ্তমান সময়লৈ চালে বেছিভাগ সময় কংগ্ৰেছেই ক্ষমতাত আছে।
ৰাহুলে লগতে কয় যে কংগ্ৰেছ নেতৃত্বাধীন ইউ পি এ মিত্ৰজোঁটে ভাৰতীয় ৰাজনীতিৰ পৰিৱৰ্তিত স্বৰূপৰ ওপৰত গুৰুত্ব আৰোপ কৰাত ব্যৰ্থ হʼল। আৰু সেইবাবেই এই মিত্ৰতাৰ পতন ঘটিছে।
ৰাহুলে কয়, “ইউ পি এ মিত্ৰজোঁটে গাঁৱৰ প্ৰতি অধিক গুৰুত্ব দিছিল যদিও চহৰৰ প্ৰতি বিশেষ গুৰুত্ব দিয়া নাছিল।এইটো বাস্তৱ। আৰু সেইবাবেই মানুহে এই মিত্ৰতা মানি লোৱা নাছিল।”
উল্লেখ্য, ব্ৰিটেইন ভ্ৰমণৰ সময়ত চীনক প্ৰশংসা কৰাৰ বাবেই বিদেশী মাটিত ভাৰতক অপমান কৰাৰ অভিযোগ উত্থাপন কৰিছে বিজেপিৰ কেন্দ্ৰীয় নেতৃত্বই। কেন্দ্ৰীয় মন্ত্ৰী অনুৰাগ ঠাকুৰে সোমবাৰে ৰাহুলক ‘বিশ্বাসঘাতক’ বুলিও অভিহিত কৰে।
