বিগত ২০১৪ চনত ৩ অক্টোবৰ তাৰিখৰ পৰা আকাশবাণী যোগে সম্প্ৰচাৰিত হোৱা প্ৰধানমন্ত্ৰী নৰেন্দ্ৰ মোদীৰ (Narendra Modi) জনপ্ৰিয় অনুষ্ঠান “মন কী বাত” (Mann ki Baat) য়ে কাইলৈ সম্পূৰ্ণ কৰিব ১০০ টা খণ্ড। প্ৰতিমাহৰ শেষৰটো দেওবাৰে সম্প্ৰচাৰ হোৱা এই অনুষ্ঠানটোত প্ৰধানমন্ত্ৰী গৰাকীয়ে দেশৰ বিভিন্ন ইতিবাচক বাৰ্তা বিশ্ববাসীলৈ প্ৰেৰণ কৰে। আমাৰ দেশৰ সফলতাৰ পৰা আৰম্ভ কৰি বিভিন্ন ক্ষেত্ৰত দেশৰ জনসাধাৰণে দেখুওৱা দক্ষতা ইত্যাদি তেখেতে উক্ত অনুষ্ঠানটোৰ জৰিয়তে সকলোৰে সমুখত দাঙি ধৰে।
কাইলৈ সম্পূৰ্ণ হ’বলগীয়া ১০০ সংখ্যক খণ্ডটো উপলক্ষে দেশজুৰি ব্যাপক প্ৰচাৰ আৰম্ভ হৈছে। উল্লেখ্য যে, সাংস্কৃতিক মন্ত্ৰালয়ে ভাৰতীয় প্ৰত্নতাত্ত্বিক জৰীপৰ অধীনৰ কীৰ্তিচিহ্নৰ লগতে সমগ্ৰ দেশৰ ১৩টা উল্লেখযোগ্য কীৰ্তিচিহ্ন আলোকসজ্জিত কৰি বিশেষ কাৰ্যসূচী প্ৰদৰ্শন কৰিব।
সাংস্কৃতিক মন্ত্ৰালয়ৰ সচিব গোবিন্দ মোহনে কৈছে যে প্রধানমন্ত্রী নৰেন্দ্ৰ মোদীয়ে তেওঁৰ মন কি বাতত বিভিন্ন বিষয় সন্দৰ্ভত জনসাধাৰণক সম্বোধন কৰাৰ লগত সংগতি ৰাখি এই প্ৰদৰ্শনীত প্ৰতিটো কীৰ্তিচিহ্নই অঞ্চলটোৰ বৈচিত্ৰতা, ঐতিহাসিক আৰু পুৰাতাত্ত্বিক গুৰুত্ব সন্দৰ্ভত প্রতিফলিত কৰা হ’ব।
