Arshad Warsi I ‘মুন্নাভাই এমবিবিএছ’ৰ পিছত ক’লৈ গ’ল আৰ্ছাদ ৱাৰ্ছি?

ডেৰ-দুই দশকৰো অধিক সময় ধৰি অভিনয় জগতত আছে। কিন্তু আৰ্ছাদ ৱাৰ্ছিৰ (Arshad Warsi) দুখৰ বিষয় যে এজন অভিনেতা হিচাপে তেওঁক এতিয়াও সঠিকভাৱে ব্যৱহাৰ কৰা নাই। তেওঁ ভাবে যে তেওঁ আৰু বেছি কৰিব পাৰিলেহেঁতেন। ১৯৮৭ চনত ‘দ্ৰামা কাছ’ ছবিত পৰিচালক মহেশ ভাটৰ সহকাৰী পৰিচালক হিচাপে কাম আৰম্ভ কৰে আৰ্ছাদে। পিছলৈ তেওঁ ‘ৰূপ কি ৰাণী চোৰো কা ৰাজা’ ছবিখনৰ টাইটেল ট্ৰেকটো কোৰিঅʼগ্ৰাফী কৰে। ১৯৯৬ চনত ‘তেৰে মেৰে চপনে’ ছবিৰ জৰিয়তে তেওঁ অভিনয়ত আত্মপ্ৰকাশ কৰে।

২০০৫ চনত তেওঁৰ ‘চেহাৰ’ ছবিত সমালোচকৰ প্ৰশংসা লাভ কৰে। ২০০৩ চনত ৰাজকুমাৰ হিৰাণীৰ ‘মুন্নাভাই এমবিবিএছ’ত অভিনয় কৰি নিশাটোৰ ভিতৰতে ষ্টাৰ হৈ পৰিছিল অভিনেতাগৰাকী। তাৰ পিছত তেওঁ চৰ্চাত নাছিল। কিন্তু কিয়?

এটা সাক্ষাৎকাৰত তেওঁ কয়, “মই সদায় অনুভৱ কৰোঁ যে অভিনেতা হিচাপে মোক অপব্যৱহাৰ কৰা হৈছে। মই জানো, মই আৰু বেছি কৰিব পাৰিলোহেঁতেন। সকলো অভিনেতাই অৱশ্যে তেনেকৈয়ে ভাবে, কিন্তু মই সঁচাকৈয়ে অনুভৱ কৰোঁ যে মোক আৰু কাম দিব পাৰিলেহেঁতেন৷” আর্ছাদে শেষ মুহূর্তত বহু কামৰ পৰা বাদ পৰা বুলিও দাবী কৰে৷

এই প্ৰসংগত তেওঁ কয়, “মই এনেকুৱা বহু কাম কৰিম বুলি উৰাবাতৰি ওলাইছিল, কিন্তু শেষ মুহূৰ্তত মই দেখিলো যে আন এজন অভিনেতাই সেই কাম কৰি আছে। মই ভাবো যে তেনেকুৱা কৰা উচিত নহয়। মই বহুত ভাল কাম কৰিব পাৰিলোহেঁতেন।” প্ৰতিভাক সঠিকভাৱে প্ৰকাশ কৰিব পৰা নগ’ল বুলি আক্ষেপ প্ৰকাশ কৰিছে আৰ্ছাদে।আৰ্ছাদক এতিয়া দেখা গৈছে ‘অসুৰ’ (Asur) ৰ দ্বিতীয় ছিজনত। ইয়াৰ পৰিচালক অনি সেন। আৰ্ছাদৰ সহ-অভিনেতা বৰুণ সোৱতী, ৰিধি ডোগ্ৰা, অনুপ্ৰিয়া গোৱেংকা আদি।