Bihar man gets wife married to her lover I স্বামীয়ে নিজেই প্ৰেমিকৰ লগত বিয়া পাতি দিলে পত্নীক

সঞ্জয় লীলা বাঞ্চালীৰ বলীউডৰ ছুপাৰহিট ছবি ‘হম দিল দে চুকে চনম’ৰ কথা সোঁৱৰাই দিলে বিহাৰৰ এটা ঘটনাই। বিয়াৰ পিছতো পত্নীয়ে প্ৰেমিকক পাহৰিব পৰা নাছিল। প্ৰেমিকৰ সৈতে নিয়মীয়াকৈ যোগাযোগ আছিল।

এই কথা গম পোৱাৰ পিছতো মহিলাগৰাকীৰ স্বামী ক্ৰোধিত হোৱা নাছিল। বৰঞ্চ স্বামীয়ে পত্নী আৰু প্ৰেমিকৰ মিলন ঘটালে। কেৱল সেয়াই নহয়, যুৱকজনে নিজেই পত্নীক প্ৰেমিকৰ লগত বিয়াও পাতি দিলে। বিহাৰৰ নৱাড়া জিলাত সংঘটিত হৈছে এই ঘটনা। শুকুৰবাৰে পোহৰলৈ আহে এই ঘটনা।

বিহাৰত সংঘটিত এই ঘটনাৰ ভিডিঅ’ ভাইৰেল হৈ পৰিছে ছচিয়েল মিডিয়াত। ভিডিঅʼটোত পত্নীয়ে শিৱ মন্দিৰত স্বামীৰ সন্মুখত প্ৰেমিকৰ সৈতে বিবাহপাশত আবদ্ধ হৈ আছে। প্ৰেমিকজনে তেওঁৰ শিৰত সেন্দুৰ পিন্ধাইছে। সেই মুহূৰ্তত মহিলাগৰাকীক কান্দি থকা দেখা গৈছে।

স্থানীয় সূত্ৰৰ পৰা জানিব পৰা মতে, শেহতীয়াকৈ মহিলাগৰাকীয়ে গভীৰ নিশা প্ৰেমিকক লগ কৰিবলৈ গৈছিল। সেই সময়ত তেওঁৰ স্বামী ব্যৱসায়ৰ বাবে বাহিৰত আছিল। সেইদিনা মহিলাগৰাকীক তেওঁলোকৰ পৰিয়ালৰ লোকে হাতে-লোতে ধৰে। ইয়াৰ পিছতে মহিলাগৰাকীৰ প্ৰেমিকক প্ৰহাৰ কৰা বুলিও অভিযোগ উত্থাপন হৈছে। পিছত দুয়োকে আটক কৰি ৰখা হয়।

গাঁৱৰ পৰা ওলাই যাবলৈও কোৱা হয়। ঘৰলৈ উভতি অহাৰ পিছত মহিলাগৰাকীৰ স্বামীয়ে সমগ্ৰ ঘটনাৰ বিষয়ে জানিবলৈ পাৰে। ইয়াৰ পিছত তেওঁ প্ৰেমিকৰ লগত পত্নীক বিয়া দিবলৈ সিদ্ধান্ত লয়। মহিলাগৰাকীৰ প্ৰেমিকো ইতিমধ্যে বিবাহিত। তেওঁৰ তিনিটা সন্তানো আছে।