Amarnath Yatra temporarily halted due to rainfall | ধাৰাসাৰ বৰষুণ আৰু দুৰ্যোগপূৰ্ণ বতৰৰ বাবে সাময়িকভাৱে স্থগিত অমৰনাথ যাত্ৰা

ধাৰাসাৰ বৰষুণ আৰু দুৰ্যোগপূৰ্ণ বতৰৰ বাবে স্থগিত ৰখা হৈছে অমৰনাথ যাত্ৰা (Amarnath Yatra)। বিগত কিছুদিন ধৰি জম্মু-কাশ্মীৰৰ (Jammu-Kashmir) বিভিন্ন প্ৰান্তত ধাৰাসাৰ বৰষুণ হৈ আছে। কেইবাঠাইতো ভূমিস্খলন সংঘটিত হৈছে। এনে পৰিস্থিতিত জম্মু-কাশ্মীৰ প্ৰশাসনে তীৰ্থযাত্ৰীসকলৰ সুৰক্ষাৰ বাবে সতৰ্কতামূলক ব্যৱস্থা হিচাপে এই যাত্ৰা সাময়িকভাৱে স্থগিত ৰখাৰ সিদ্ধান্ত লৈছে।

প্ৰশাসনৰ মতে, বতৰ উন্নত হʼলেহে পুনৰ যাতায়াতৰ অনুমতি দিয়া হʼব। এই বিপৰ্যয়জনক বতৰৰ বাবে বিভিন্ন স্থানত আবদ্ধ হৈ আছে প্ৰায় ৭২০০ তীৰ্থযাত্ৰী। শুকুৰবাৰে প্ৰশাসনে এক অধিসূচনা জাৰি কৰি কয়, “যাত্ৰা সাময়িকভাৱে স্থগিত ৰখা হৈছে। কোনো তীৰ্থযাত্ৰীক অমৰনাথ গুহাৰ দিশে যাবলৈ দিয়া নহ’ব।”

আৰক্ষীৰ সূত্ৰ অনুসৰি, পহলগাঁৱৰ নুনৱান শিবিৰত আবদ্ধ হৈ আছে ৩২০০ তীৰ্থযাত্ৰী। আনহাতে, বাল্টাল শিবিৰত ৪০০০ তীৰ্থযাত্ৰী আছে। বৃহস্পতিবাৰে অমৰনাথ গুহাত উপস্থিত হয় ১৭০০ তীৰ্থযাত্ৰী। তেতিয়াৰ পৰা বতৰৰ পৰিস্থিতিৰ অৱনতি ঘটিবলৈ ধৰিলে। ৭২০০ জনীয়া তীৰ্থযাত্ৰীৰ দলটোৱে অমৰনাথ অভিমুখে ৰাওনা হোৱাৰ পূৰ্বেই দুৰ্যোগৰ সৃষ্টি হয়। ফলত প্ৰশাসনে কোনো ধৰণৰ ৰিস্ক লʼব বিচৰা নাছিল। খৰখেদাকৈ তীৰ্থযাত্ৰীৰ যাত্ৰা বন্ধ কৰি দিয়ে।

এসপ্তাহ পূৰ্বে আৰম্ভ হৈছিল অমৰনাথ যাত্ৰা। জম্মু-কাশ্মীৰ প্ৰশাসনৰ তথ্য অনুসৰি, বিগত ৭ দিনত ৮৫ হাজাৰ তীৰ্থযাত্ৰীয়ে অমৰনাথ গুহা দৰ্শন কৰিছে।