জ্যেষ্ঠ কংগ্ৰেছ নেতা তথা কেৰালাৰ প্ৰাক্তন মুখ্যমন্ত্ৰী ওমেন চাণ্ডীৰ (Oommen Chandy) মৃত্যু। মৃত্যুৰ সময়ত তেওঁৰ বয়স আছিল ৭৯ বছৰ । মঙলবাৰে পুৱা বেংগালুৰুত শেষ নিশ্বাস ত্যাগ কৰে তেওঁ।
এখন ব্যক্তিগত চিকিৎসালয়ত চিকিৎসাধীন হৈ আছিল জ্যেষ্ঠ নেতাগৰাকী। ওমেন চাণ্ডীৰ মৃত্যুৰ কথা ছচিয়েল মিডিয়াত প্ৰকাশ কৰে তেওঁৰ পুত্ৰই। কেৰালা প্ৰদেশ কংগ্ৰেছৰ সভাপতি কে সুধাকৰণে ছচিয়েল মিডিয়াত শোক প্ৰকাশ কৰে।
এটা টুইটত তেওঁ লিখিছে, “আজি ওমেন চাণ্ডীৰ দৰে কিংবদন্তি এজনক হেৰুৱাই মই গভীৰভাৱে দুখী।” সুধাকৰণে তেওঁৰ আত্মাৰ শান্তিৰ বাবে প্ৰাৰ্থনা কৰে। প্ৰাক্তন মুখ্যমন্ত্ৰীগৰাকীৰ মৃত্যুৰ পৰিপ্ৰেক্ষিতত মঙলবাৰে চৰকাৰী বন্ধ আৰু দুদিনীয়া শোক ঘোষণা কৰিছে কেৰালা চৰকাৰে।
ওমেন চাণ্ডী ৰাজনীতিত সদায় সফল হৈ আহিছে। ২৭ বছৰ বয়সত প্ৰথমবাৰৰ বাবে বিধায়ক হয়। এতিয়ালৈকে তেওঁ কেৰালাৰ আটাইতকৈ দীৰ্ঘদিনীয়া বিধানসভাৰ সদস্য হিচাপে কাৰ্যনিৰ্বাহ কৰি আহিছে।
একেৰাহে ১১ বাৰ বিধানসভা নিৰ্বাচনত জয়লাভ কৰে তেওঁ। অৰ্থাৎ ডেৰ শতিকাতকৈও অধিক সময় তেওঁ বিধায়ক হিচাপে কাম কৰিছিল। তেওঁ দুবাৰকৈ কেৰালাৰ মুখ্যমন্ত্ৰী হিচাপেও কাৰ্যনিৰ্বাহ কৰিছিল। তেওঁৰ মৃত্যুত ৰাজনৈতিক মহলে গভীৰ শোক প্ৰকাশ কৰিছে। শোক প্ৰকাশ কৰে প্ৰধানমন্ত্ৰী নৰেন্দ্ৰ মোডীয়েও ।
