ভাৰতীয় মহাকাশ সংস্থা ইছৰোৰ চন্দ্ৰযান-৩ (ISRO’s Chandrayaan-3) চন্দ্ৰৰ মহাকৰ্ষণীয় টানত আন এক কক্ষপথ অতিক্ৰম কৰিলে। বুধবাৰে বিয়লি দ্বিতীয়টো কক্ষপথ পৰিৱৰ্তন প্ৰক্ৰিয়া সম্পূৰ্ণ হয়। চন্দ্ৰৰ পৰা চন্দ্ৰযান-৩ৰ দূৰত্ব এতিয়া মাত্ৰ ১,৪৩৭ কিলোমিটাৰ।
বুধবাৰে বিয়লি ইছৰোৱে টুইটযোগে চন্দ্ৰযান-৩ চন্দ্ৰৰ ওচৰ পোৱাৰ খবৰটো প্ৰকাশ কৰে। ইয়াৰ কক্ষপথ আৰু অলপ কমি গৈছে। মহাকাশযানখন বৰ্তমান ১৭৪ কিলোমিটাৰ X ১৪৩৭ কিলোমিটাৰ কক্ষপথত আছে। চন্দ্ৰযান-৩ উক্ত কক্ষপথত চন্দ্ৰক প্ৰদক্ষিণ কৰি আছে। অৰ্থাৎ চন্দ্ৰত উপনীত হʼবলৈ আৰু ১৪৩৭ কিলোমিটাৰ (Another 1437 km to reach the moon ) অতিক্ৰম কৰিব লাগিব।
চন্দ্ৰত উপনীত হʼবলৈ ইছৰোৱে চন্দ্ৰযান-৩ৰ কক্ষপথ মুঠ পাঁচবাৰ সলনি কৰাৰ পৰিকল্পনা কৰিছে। ইয়াৰ প্ৰথম কক্ষপথ পৰিৱৰ্তন হৈছিল যোৱা দেওবাৰে। ইয়াৰ পিছত বুধবাৰে ইছৰোৰ চন্দ্ৰযানে দ্বিতীয় কক্ষপথো অতিক্ৰম কৰে।
হিচাপ কৰা মতে আৰু তিনিটা কক্ষপথ বাকী আছে। সেইকেইটাত সফলতা লাভ কৰাৰ পিছতহে ইছৰোৱে চন্দ্ৰক ‘স্পৰ্শ’ কৰিবলৈ সক্ষম হʼব।ইছৰোৰ তথ্য অনুসৰি, চন্দ্ৰযান-৩ৰ পৰৱৰ্তী কক্ষপথ পৰিৱৰ্তন হʼব ১৪ আগষ্টত, পুৱা ১১.৩০ বজাৰ পৰা নিশা ১২.৩০ বজাৰ ভিতৰত।
