ভাৰতীয় মহাকাশ গৱেষণা সংস্থা ইছৰো (ISRO)ৰ দ্বাৰা নিৰ্মিত চন্দ্ৰযান-৩ (Chandrayaan-3) চন্দ্ৰত উপনীত হʼবলৈ মাত্ৰ ১৭৭ কিলোমিটাৰ যাত্ৰা (Just 177 km journey) কৰিব লাগিব। সোমবাৰে মহাকাশযানখনে পৃথিৱীৰ উপগ্ৰহৰ আৰু অলপ ওচৰ পায়গৈ। ইছৰোৱে সফলতাৰে কক্ষপথ সলনি কৰে।
চন্দ্ৰযান-৩ৰ আন এক কক্ষপথ পৰিৱৰ্তন প্ৰক্ৰিয়া সফলভাৱে সম্পূৰ্ণ হৈছে বুলি ইছৰোৱে টুইটযোগে প্ৰকাশ কৰিছে। চন্দ্ৰযান-৩ বৰ্তমান ১৫০ কিলোমিটাৰ X ১৭৭ কিলোমিটাৰ কক্ষপথত আছে। চন্দ্ৰৰ টানত উক্ত কক্ষপথৰ পৰা চন্দ্ৰৰ চাৰিওফালে ঘূৰি থাকে। পৰৱৰ্তী কক্ষপথ পৰিৱৰ্তন হোৱাৰ কথা বুধবাৰে পুৱা ৮.৩০ বজাত।
এতিয়াও দুটা কক্ষপথ যাত্ৰা কৰিবলগীয়া আছে। ইয়াৰ পিছত চন্দ্ৰযান-৩ ১৫০ কিলোমিটাৰ দূৰত্বৰ কক্ষপথত উপনীত হʼব। ইয়াৰ পিছত ইয়াৰ অন্তিম গন্তব্যস্থান চন্দ্ৰৰ পৰা ১০০ কিলোমিটাৰ দূৰত্বত থকা কক্ষপথ। তাৰ পৰাই ভাৰতীয় মহাকাশযানখন চন্দ্ৰৰ দক্ষিণ মেৰুত অৱতৰণ কৰিব।
উল্লেখযোগ্য যে ১৪ জুলাইৰ দুপৰীয়া ২.৩৫ বজাত অন্ধ্ৰপ্ৰদেশৰ শ্ৰীহৰিকোটাৰ সতীশ ধৱন মহাকাশ কেন্দ্ৰৰ লঞ্চ পেডৰ পৰা চন্দ্ৰযান-৩ সফলতাৰে উৎক্ষেপণ কৰা হয়। চন্দ্ৰযান-৩ উৎক্ষেপণৰ ২২ দিনৰ পিছত চন্দ্ৰৰ কক্ষপথত উপনীত হয়। ইয়াৰ আগতে পৃথিৱীৰ মাধ্যাকৰ্ষণ শক্তিৰ টানত মহাকাশযানখন পৃথিৱীৰ কক্ষপথত ঘূৰি আছিল। তাতো পাঁচবাৰ কক্ষপথ সলনি হৈছে।
ইছৰোৰ চন্দ্ৰলৈ মানৱবিহীন মহাকাশযান প্ৰেৰণৰ এইটো তৃতীয় অভিযানৰ। ইয়াৰ পূৰ্বে দুবাৰকৈ ইছৰোৰ অভিযান বিফল হৈছে। চন্দ্ৰযান-৩ৰ লেণ্ডাৰ বিক্ৰমে ২৩ আগষ্টৰ বিয়লি ৫.৪৭ বজাত ৰ’ভাৰ প্ৰজ্ঞানক লৈ চফ্ট লেণ্ডিং কৰাৰ কথা। চাৰি বছৰ পূৰ্বে সেই পৰ্যায়তে ইছৰোৰ ‘চন্দ্ৰযান-২’ বিফল হৈছিল। যদি এই অভিযান সফল হয় তেন্তে ভাৰতৰ মহাকাশ গৱেষণাই নিঃসন্দেহে নতুন উচ্চতা লাভ কৰিব। আমেৰিকা, ৰাছিয়া আৰু চীনৰ পিছত চন্দ্ৰত মহাকাশযান সফলতাৰে অৱতৰণ কৰা চতুৰ্থখন দেশ হিচাপে পৰিগণিত হʼব ভাৰত।
