ৰাজ্যত বান পৰিস্থিতিৰ মাজতে কৰিমগঞ্জত (Karimganj) সংঘটিত হৈছে এক শোকাৱহ ভূমিস্খলৰ ঘটনা৷ এই ঘটনাত একেটা পৰিয়ালৰ ৫ সদস্যৰ মৃত্যু ঘটে৷ উল্লেখ্য যে ৰাজ্যৰ শেহতীয়া বানত আটাইতকৈ বেছি ক্ষতিগ্ৰস্ত হৈছে কৰিমগঞ্জত।
বিগত কেইবাদিনো ধৰি চলি থকা নেৰানেপেৰা বৰষুণৰ ফলত মঙলবাৰে নিশা এই ভয়ংকৰ ভূমিস্খলনৰ ঘটনাটো সংঘটিত হয়৷ কৰিমগঞ্জৰ বদৰপুৰৰ বেণ্ডাৰগোল এলেকাৰ তাজুৰতল গাঁৱত এই ভয়ংকৰ ঘটনাটো সংঘটিত হয়। এই ঘটনাত আব্দুল কৰিম নামৰ এজন ব্যক্তিৰ পৰিয়ালটোলৈ নামি আহে কাল অমানিশা৷
এই ঘটনাৰ পিছতে বদৰপুৰ আৰক্ষী আৰু এছ ডি আৰ এফ ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে।
ভূমিস্খলনত মৃত্যু হোৱা লোককেইজন হৈছে আব্দুল কৰিমৰ পত্নী ৰাইমুন নেছা (55), কন্যা চাহিদা খানম (18), জাহেদা খানম (16), হামিদা খানম (11) আৰু নাতি মেহেদি হাছান (3) ৷ ঘটনাটো নিশা প্ৰায় ১২ বজাত সংঘটিত হোৱা বুলি জানিব পৰা গৈছে ৷
