অসমকে ধৰি চুবুৰীয়া ৰাজ্যসমূহত বিগত কেইবা দিনো ধৰি হৈ থকা নেৰানেপেৰা বৰষুণৰ ফলত অসমত ভয়াৱহ বান (Assam Flood) পৰিস্থিতিৰ সৃষ্টি হৈছে। যাৰ ফলত কেইবাখনো জিলাৰ লক্ষাধিক লোক ক্ষতিগ্ৰস্ত হৈছে।
আনহাতে, মথাউৰি ছিগা, পথত খহনীয়া আদি ঘটনাৰ লগতে বিস্তীৰ্ণ কৃষিপথাৰো বানৰ কবলত। তাৰ মাজতে নিৰাপদ আশ্ৰয়ৰ সন্ধানত বানাক্ৰান্তই মথাউৰি, ওখ স্থান বা আশ্রয় শিবিৰত আশ্ৰয় লৈছে।
আনহাতে, খহনীয়াত ভেটি-মাটি উছন যোৱাৰ লগতে কেইবাটাও প্ৰাণহানিৰ ঘটনা সংঘটিত হৈছে। ইফালে খাদ্য, খোৱাপানী, ঔষধ তথা প্রয়োজনীয় চিকিৎসাৰো অভাৱ ঘটিছে।
একেদৰে পোহনীয়া জীৱ-জন্তুও ক্ষতিগ্ৰস্ত হৈছে। আনহাতে আকৌ বানৰ প্রকোপত বনাঞ্চল এৰি জনাঞ্চললৈ ঢাপলি মেলিছে বন্যপ্ৰাণীয়ে৷
মাজতে এটা দিন কোনো কোনো অঞ্চলত বানৰ পানী শুকাইছিল যদিও বৃহস্পতিবাৰে নিশাৰে পৰা হোৱা ধাৰাসাৰ বৰষুণৰ ফলত পুনৰ ব্ৰহ্মপুত্ৰ আৰু ইয়াৰ উপনৈসমূহ ফেনে-ফোটোকাৰে বাঢ়ি আহিছে।
যাৰ ফলত বিগত ২৪ ঘণ্টাত উজনি-নামনি, বৰাক-ব্ৰহ্মপুত্ৰ উপত্যকাৰ বহুকেইখন জিলাৰ ন ন অঞ্চল পুনৰ প্লাবিত হৈছে। কেন্দ্ৰীয় জল আয়োগৰ তথ্য মতে, নিমাতীঘাট, গোৱালপাৰা, গুৱাহাটী আৰু ধুবুৰীত ব্ৰক্ষ্মপুত্ৰ নদী বিপদসীমাৰ ওপৰেৰে বৈ আছে। আনহাতে, বুঢ়িদিহীং, দিচাং, কপিলী, জীয়াভৰলী, দিখৌ, বৰাক, কুচিয়াৰা নদীও বিপদসীমাৰ ওপৰেৰে বৈ আছে।
অৱশ্যে চৰকাৰী তথ্য মতে, বিগত ২৪ ঘণ্টাত ৰাজ্যত বানত কোনো লোকৰ মৃত্যু হোৱা নাই।
ইফালে ৰাজ্যিক দুর্যোগ ব্যৱস্থাপনা বিভাগৰ শেহতীয়া তথ্যমতে, ৰাজ্যৰ মুঠ ৩,৬১৮ গাঁও পানীৰ তলত। বঙাইগাঁও, ধুবুৰী, কামৰূপ, মৰিগাঁও, নগাঁও, নলবাৰী, শোণিতপুৰ, দক্ষিণ শালমাৰা আদি জিলাৰ বহুকেইটা ৰাজহ চক্ৰৰ ভালেমান অঞ্চল বানৰ কবলত।
এই মুহূৰ্তত ৰাজ্যত বানত আক্ৰান্ত হৈছে প্রায় 24.22 লাখ। ধুবুৰী জিলাত সৰ্বাধিক ৭.৭ লাখ লোক বানত ক্ষতিগ্ৰস্ত হৈছে। ইয়াৰ উপৰি বৰপেটাত ১.৩৯ লাখ, কাছাৰত ১.৭৫ লাখ, দৰঙত ১.৮৬ লাখ, মৰিগাঁৱত ১.৪৬ লাখ লোক বানৰ কবলত পৰিছে।
