৯ বছৰ ধৰি ৰায়পুৰ বিমানবন্দৰত (Raipur Air Base) থিয় হৈ আছে এখন বিমান। তাত এতিয়া চৰায়ে বাহ সাজিছে, লতাজাতীয় গছবোৰ ইঞ্জিনৰ ওপৰত বগাইছে। কিন্তু মেকডনেল ডগলাছ ৮৩ নামৰ বিমানখন ৰ’দ-বৰষুণ মূৰত লৈ অলৰ-অচৰ হৈ একেদৰেই থিয় হৈ আছে।
আচলতে এইখন হৈছে এখন বাংলাদেশী বিমান। ২০১৫ চনত ঢাকাৰ পৰা মাস্কাটলৈ গৈ থকা ইউনাইটেড এয়াৰৱেজৰ এই বিমানখনে হঠাৎ ইঞ্জিন বিকল হোৱাৰ বাবে ১৭৩ জন যাত্ৰী লৈ ৰায়পুৰ বিমানবন্দৰত জৰুৰীকালীন অৱতৰণ কৰে। তেতিয়াৰে পৰাই ৰায়পুৰ বিমানবন্দৰ ইয়াৰ ঠিকনা।
সংবাদ মাধ্যমৰ প্ৰতিবেদন অনুসৰি, ২০১৫ চনৰ ৭ আগষ্টত ৩২ হাজাৰ ফুট উচ্চতাত উৰণৰ সময়ত বিমানখনৰ ইঞ্জিন হঠাতে বিকল হৈ পৰে। ইয়াৰ পিছত পাইলটজনে ওচৰৰ ৰায়পুৰ বিমানবন্দৰত জৰুৰীকালীন অৱতৰণ কৰে।
বিমানখনত থকা ১৭৩ জন যাত্ৰীক মাস্কাটলৈ আন এখন বিমানেৰে প্ৰেৰণ কৰা হয়।
ৰায়পুৰৰ বিমান পৰিবহণ নিয়ন্ত্ৰণ বিভাগৰ মুৰব্বী এইচ ডি শৰ্মাই সংবাদ মাধ্যমক জনোৱা মতে, ভৱিষ্যতে বিমানখনৰ সৈতে কি কৰা হ’ব কোনেও নাজানে। কাৰণ এই ধৰণৰ ঘটনা ভাৰতত প্ৰথম। এই ক্ষেত্ৰত কোনো স্পষ্ট নিয়ম নাই।
বিগত ৯ বছৰত বাংলাদেশী বিমান কোম্পানীটোৰ অভিযন্তাসকলে আহি কেইবাবাৰো বিমানখন মেৰামতিৰ চেষ্টা চলাইছে যদিও কোনো ফল পোৱা নাই। অৱশেষত তেওঁলোকে হাৰ মানে আৰু তেতিয়াৰে পৰাই বিদেশৰ বিমানবন্দৰত থিয় হৈ আছে ডগলাছ ৮৩। আনহাতে, ৰায়পুৰ বিমানবন্দৰ কৰ্তৃপক্ষই বিমানখন বাংলাদেশলৈ ঘূৰাই পঠিয়াবলৈ উচ্চ কৰ্তৃপক্ষলৈ কেইবাখনো পত্ৰ লিখিছে।
বাংলাদেশ ইউনাইটেড এয়াৰৱেজকো দিয়া হৈছে এখন পত্ৰ। কিন্তু তাৰ কোনো সঁহাৰি পোৱা নাই। ইফালে প্ৰতি ঘণ্টাত ৩২০ টকাকৈ ৯ বছৰত বিমানবন্দৰত পাৰ্কিং মাচুলৰ বাবদ ৪ কোটি টকা দিবলগা হৈছে। কিন্তু এতিয়া কোনে দিব ইমান পৰিমাণৰ ধন তাৰো উত্তৰ নাই। কাৰণ ২০১৬ চনৰ মাৰ্চ মাহত কোম্পানীটো বন্ধ হৈ পৰে। ফলত সেই বিমানখনৰ ভাগ্য কি হ’ব সেয়া কোনেও নাজানে।
আনহাতে, ইমানদিনে এনেদৰে পৰি থকাৰ ফলত ডগলাছৰ কেবিনত চৰাইবোৰে বাহ সাজিছে। ককপিটৰ ওপৰত গছ-গছনি গজিছে। এখন যাত্ৰীবাহী বিমান এতিয়া বহিৰাষ্ট্ৰত অকলশৰে বহি থাকি ঘৰলৈ উভতি যোৱাৰ ক্ষণ গণিছে!
