বুধবাৰে প্ৰথমবাৰৰ লখিমপুৰত অনুষ্ঠিত অসম চৰকাৰৰ কেবিনেট বৈঠক (Assam Cabinet)। এই বৈঠকত বহুকেইটা গুৰুত্বপূৰ্ণ সিদ্ধান্ত গ্ৰহণ কৰা হয়। মুখ্যমন্ত্ৰীয়ে সংবাদমেলযোগে এই সিদ্ধান্তবোৰ ঘোষণা কৰে। কি কি সিদ্ধান্ত গ্ৰহণ কৰা হ’ল এবাৰ চাওঁ আহক :
– দুৰ্ঘটনাত নিহত বা আংশিক বা সম্পূর্ণভাৱে ক্ষতিগ্ৰস্ত ৰাজ্য চৰকাৰৰ কৰ্মচাৰীৰ বাবে বিশেষ সুবিধা ঘোষণা। দুৰ্ঘটনাত মৃত্যু হ’লে লাভ কৰিব ১ কোটি টকা। সম্পূৰ্ণৰূপে ক্ষতিগ্ৰস্ত হ’লেও পাব ১ কোটি। আংশিক ক্ষতিত ৮০ লাখ ক্ষতিপূৰণ। পূৰ্বৰ দৰে চৰকাৰী কৰ্তব্য সম্পাদন কৰাৰ সময়ত এনে ঘটনা ঘটিলে লাভ কৰা সা-সুবিধাৰ উপৰি এয়া অতিৰিক্তভাৱে পাব৷
– অসম চুক্তিৰ ৬ নং দফা ৰূপায়ণৰ বাবে গঠন কৰা ন্যায়াধীশ বিপ্লৱ শৰ্মাৰ প্ৰতিবেদনৰ ৬৭ টা পৰামৰ্শৰ ভিতৰত ৫৭ টাত অনুমোদন। বাকী ১০ টা কেন্দ্ৰীয় চৰকাৰৰ সৈতে আলোচনাৰ পিচত পৰৱৰ্তী সময়ত ব্যৱস্থা গ্ৰহণ কৰা হ’ব। ২০২৫ চনৰ এপ্ৰিল মাহৰ ভিতৰত ৰূপায়ণ কৰা হ’ব এই পৰামৰ্শবোৰ।
অসম চুক্তিৰ ৬ নং দফাত কোৱা হৈছে যে উপযুক্ত সাংবিধানিক, আইনী আৰু প্ৰশাসনিক সুৰক্ষাৰ জৰিয়তে অসমবাসীৰ সাংস্কৃতিক, সামাজিক, ভাষিক পৰিচয় আৰু ঐতিহ্য সুৰক্ষিত, সংৰক্ষণ আৰু প্ৰচাৰ কৰিব লাগে ।
অৱশ্যে ষষ্ঠ অনুসূচীৰ অন্তৰ্ভুক্ত অঞ্চল আৰু বৰাক উপত্যকাৰ বাহিৰে এই পৰামৰ্শসমূহ সমগ্ৰ ৰাজ্যতে প্ৰযোজ্য হ’ব । এই নিৰ্দিষ্ট অঞ্চলবোৰত তাৰ কৰ্তৃপক্ষ আৰু জনসাধাৰণৰ সন্মতিৰ পিচতহে পৰামৰ্শবোৰ কাৰ্যকৰী কৰা হ’ব ।
– এছ বি আইকে ধৰি বিভিন্ন বেংকৰ লগত ৰাজ্য চৰকাৰে এক চুক্তি স্বাক্ষৰ কৰিব। চুক্তি অনুযায়ী দৰমহা লোৱা বেংকটোৱে কৰ্মচাৰীজনৰ পৰিয়াললৈ বীমা আঁচনিত আগবঢ়াব।
– ২ অক্টোবৰত ৩৯ খন সমজিলা ঘোষণা কৰিবলৈ কেবিনেটত অনুমোদন। এই সমজিলাসমূহত মাটি-বাৰী, বিধায়কৰ পুঁজি আদিৰ দৰে কাম-কাজসমূহ সম্পন্ন হ’ব।
– নতুনকৈ ২০ লাখ লোকক ৰেচন কাৰ্ড প্ৰদানত কেবিনেটৰ অনুমোদন। ১৫ ছেপ্টেম্বৰৰ পূৰ্বে ইয়াৰ কাম আৰম্ভ হ’ব৷
– ২০ নৱেম্বৰৰ দিনটোক ৰাঘৱ মৰাণ দিৱস হিচাপে পালনৰ ঘোষণা। এই দিনটোত সীমিত বন্ধৰ দিন ঘোষণা।
– অসম চাহ নিগমৰ চৰকাৰৰ অধীনস্থ বাগিচাসমূহত প্ৰদান কৰা হ’ব ২০ শতাংশ পূজাৰ বোনাচ।
– লখিমপুৰৰ ৰঙানদী সমষ্টিৰ ডিজু কিমিন পথৰ ৩৪ কিলোমিটাৰ উন্নয়নত ২৭ কোটিৰ অনুমোদন। ডিক্ৰং বাহনাবাৰী মথাউৰি তথা পথ উন্নয়নৰ বাবে ২৫ কোটি অনুমোদন। নাওবৈচা সমষ্টিৰ খাৰকাটি চোমনি বিহপুৰীয়া সংযোগী ৩০ কিলোমিটাৰ পথৰ বাবে ৪৪ কোটি অনুমোদন।
বগীনদীত ১৫ কোটিটকীয়া অতিথিশালা নিৰ্মাণত অনুমোদন। ঢকুৱাখনা সমষ্টিৰ ৩০ খন বিছনাযুক্ত চিকিৎসালয়ক ২০০ খনলৈ উন্নীতকৰণ, ফাট বিহুৰ প্ৰেক্ষাগৃহ নিৰ্মাণৰ বাবে ২০ কোটিৰ অনুমোদন, মাধৱদেৱৰ জন্মস্থান উন্নয়নৰ বাবে ৩০ কোটি, অনিৰুদ্ধদেৱৰ জন্মস্থান উন্নয়নৰ বাবে ১৫ কোটি অনুমোদন কেবিনেটৰ।
–
