বোকাখাতৰ বিহৰা (Bihra of Bokakhat) ১২ নং লাইনৰ সমীপত ৩৭ নং ৰাষ্ট্ৰীয় ঘাইপথত ২২ ছেপ্তেম্বৰৰ নিশা সংঘটিত হয় এক পথ দুৰ্ঘটনা (Road accidents)। ক্ৰমে এ এচ ১৭ চি ৮২৮৭ পঞ্জীয়ন নম্বৰৰ মালবাহী ট্ৰাক আৰু এন এল ০১ এ এফ ১৭৩৫ পঞ্জীয়ন নম্বৰৰ টেংকাৰৰ মাজত মুখামুখি সংঘৰ্ষ হয়। দুৰ্ঘটনাত টেংকাৰৰ চালকজন বহু সময় গাড়ীত চেপা খাই আবদ্ধ হৈ থাকে। স্থানীয় ৰাইজৰ সহযোগত চালকজনক উদ্ধাৰ কৰা হয়। দুয়োগৰাকী চালকক বোকাখাত শ্বহীদ কমলা মিৰি মহকুমা অসামৰিক চিকিৎসালয়লৈ চিকিৎসাৰ বাবে লৈ যোৱা হয়। দূৰ্ঘটনাটোত টেংকাৰ চালক গৰাকীৰ ভৰি এখন চেঁপা খাই আঘাতপ্ৰাপ্ত হয় আৰু বোকাখাত শ্বহীদ কমলা মিৰি মহকুমা অসামৰিক চিকিৎসালয়ত প্ৰাথমিক চিকিৎসা প্ৰদান কৰি যোৰহাট চিকিৎসা মহাবিদ্যালয় হাস্পাতাললৈ উন্নত চিকিৎসাৰ বাবে প্ৰেৰণ কৰা হয়।
আনহাতে মালবাহী ট্ৰাকৰ চালকগৰাকী সাধাৰণ আঘাতপ্ৰাপ্ত আৰু বিপদমুক্ত বুলি জানিব পৰা গৈছে। দুয়োগৰাকী চালক বিহাৰী সম্প্ৰদায়ৰ বুলি জানিব পৰা গৈছে। লগতে জানিব পৰা মতে টেংকাৰ চালক গৰাকীৰ ঘৰ বিহাৰত আৰু আন গৰাকীৰ ঘৰ অসমৰ ধুবুৰীত।
