ঝাৰখণ্ড (Jharkhand)ত অনুষ্ঠিত হ’বলগীয়া প্ৰথম পৰ্যায় (First phase)ৰ বিধানসভা নিৰ্বাচন (Assembly Elections)ত মুঠ ৬৮৫ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে। শুকুৰবাৰে এই কথা অৱগত কৰে নিৰ্বাচন আয়োগে। ১৩ নৱেম্বৰ (13 November)ত অনুষ্ঠিত হ’ব প্ৰথম পৰ্যায়ৰ ভোটগ্ৰহণ।
১৮-২৫ অক্টোবৰলৈ ঝাৰখণ্ডত অনুষ্ঠিত হৈছিল প্ৰথম পৰ্যায়ৰ ভোটগ্ৰহণৰ বাবে মনোনয়ন দাখিল পৰ্ব। ৰাজ্যখনৰ মুখ্য নিৰ্বাচনী বিষয়া কে ৰবিকুমাৰে কয়, “মুঠ ৮০৫ জনে মনোনয়ন দাখিল কৰিছিল। মনোনয়ন পৰীক্ষাৰ পিছত ৭৪৩ জনক ‘বৈধ প্ৰাৰ্থী’ ঘোষণা কৰা হৈছে। ইয়াৰ পিছত ৫৮ জন লোকে মনোনয়ন প্ৰত্যাহাৰ কৰে। বৰ্তমান প্ৰতিদ্বন্দ্বিতাত ৬৮৫ জন লোক আছে।” জামছেদপুৰ-পূব সমষ্টিত সৰ্বাধিক ২৮ জন আৰু জগন্নাথপুৰ সমষ্টিত সৰ্বনিম্ন ৮ জন প্ৰাৰ্থীয়ে প্ৰতিদ্বন্দ্বিতা আগবঢ়াইছে বুলিও ৰবিয়ে জানিবলৈ দিয়ে।
২০১৯ চনৰ বিধানসভা নিৰ্বাচনত এই ৪৩টা সমষ্টিত মুঠ প্ৰাৰ্থীৰ সংখ্যা আছিল ৬৩৩ জন। প্ৰথম পৰ্যায়ৰ ভোটগ্ৰহণত বিজেপিৰ গুৰুত্বপূৰ্ণ প্ৰাৰ্থীৰ ভিতৰত আছে প্ৰাক্তন মুখ্যমন্ত্ৰী চাম্পাই ছোৰেন (ছেৰাইকেলা), তেওঁৰ পুত্ৰ বাবুলাল (ঘাটশিলা), প্ৰাক্তন মুখ্যমন্ত্ৰী মধু কোৰাৰ পত্নী তথা প্ৰাক্তন সাংসদ গীতা কোৰা (জগন্নাথপুৰ) আৰু আন এগৰাকী প্ৰাক্তন মুখ্যমন্ত্ৰী অৰ্জুন মুণ্ডাৰ পত্নী মীৰা (পটকা)।
উল্লেখযোগ্য কংগ্ৰেছ প্ৰাৰ্থী হৈছে এ আই চি চিৰ সাধাৰণ সম্পাদক তথা প্ৰাক্তন আই পি এছ অজয় কুমাৰ (জামছেদপুৰ পূব) আৰু মুখ্যমন্ত্ৰী হেমন্ত ছোৰেনৰ কেবিনেট সদস্য তথা প্ৰাক্তন কেন্দ্ৰীয় মন্ত্ৰী ৰামেশ্বৰ ওৰাওন (লোহৰদগা)।
অহা ২০ নৱেম্বৰত দ্বিতীয় আৰু অন্তিম পৰ্যায়ত ঝাৰখণ্ডৰ বাকী ৩৮টা বিধানসভা সমষ্টিত ভোটগ্ৰহণ অনুষ্ঠিত হ’ব। ২৩ নৱেম্বৰত হ’ব ভোটগণনা।
