বিশ্ববিখ্যাত অসমৰ এশিঙীয়া গঁড়ৰ অস্তিত্বক সংকটত পেলাবলৈ চোৰাং চিকাৰীয়ে চলোৱা অপচেষ্টাৰ সফল প্ৰত্যুত্তৰ আজি কাজিৰঙা ৰাষ্ট্ৰীয় উদ্যানত বন বিভাগৰ। কাজিৰঙা ৰাষ্ট্ৰীয় উদ্যানৰ অগৰাতলী বনাঞ্চলত আজি এটি সূত্ৰৰ পৰা পুৱাই প্ৰাপ্ত এক তথ্যৰ পম খেদি বন বিভাগ, আৰক্ষীৰ এক মিলিত অভিযানত এক চোৰাং চিকাৰী নিহত হয়।
কাজিৰঙা ৰাষ্ট্ৰীয় উদ্যান আৰু ব্যঘ্ৰ সংৰক্ষিত বনাঞ্চলৰ আগৰাতলী বনাঞ্চলৰ দুৰামাৰী বনশিবিৰ এলেকাত সংঘটিত হৈছে এই ঘটনা। আজি দিনৰ প্ৰায় ১২.৪৫ বজাত ২/৩ জনীয়া চোৰাং চিকাৰী দলক বনকৰ্মীয়ে প্ৰত্যক্ষ কৰাৰ পাছত দুয়োপক্ষৰ মাজত সংঘৰ্ষ হয়। ফলত এজন চোৰাং চিকাৰী মৃত্যু হয়।
বৰ্তমানলৈকে উদ্ধাৰ হোৱা নাই মৃত চোৰাং চিকাৰীৰ পৰিচয়। ঘটনাস্থলীৰ পৰা এটা ৩০৩ ৰাইফল, এটা মোনা আৰু এখন কুঠাৰ উদ্ধাৰ হয়। বোকাখাত আৰক্ষী আৰু সমজিলাৰ দণ্ডাধীশৰ উপস্থিতিত মৃতদেহ উদ্ধাৰ কৰা হয়।
মৃত চোৰাং চিকাৰীটোৰ লগত উদ্ধাৰ হোৱা মাৰণাস্ত্ৰ, মোনা আৰু কুঠাৰলৈ চাই গঁড় হত্যা কৰি খড়্গ কাটি নিয়াৰ উদ্দেশ্যে চোৰাং চিকাৰীৰ দলটোৱে কাজিৰঙা ৰাষ্ট্ৰীয় উদ্যানত প্ৰৱেশ কৰাৰ সন্দেহ কৰা হৈছে। আনহাতে পলাই যোৱা চিকাৰীৰ সন্ধানত আৰক্ষী আৰু বন বিভাগে ইতিমধ্যে তালাচী অভিযান চলাইছে।
উল্লেখ্য যে অস্ত্ৰধাৰী চোৰাং চিকাৰীৰ গতি-বিধিৰ সন্দৰ্ভত লাভ কৰা তথ্যৰ ভিত্তিত, আজি পুৱা উদ্যানখনত থকা সকলো এণ্টি-প’চিং কেম্প আৰু কমাণ্ডো কাৰ্য্যদল সক্ৰিয় কৰা হয় আৰু উদ্যানখনত চাৰিওফালে তালাচি চলাই উদ্যানৰ পৰা বাহিৰ ওলোৱাৰ সকলো পথ বন্ধ কৰি দিয়া হয়।
তাৰ পাছত দুপৰীয়া প্ৰায় ১২.৪৫ বজাত দুৰামাৰী এপিচি অঞ্চলত মাৰণাস্ত্ৰ লৈ প্ৰৱেশ কৰা চোৰাং চিকাৰীৰে সতে বন বিভাগৰ মুখামুখি সংঘৰ্ষৰ সংঘটিত হোৱাৰ ফলত এই অস্ত্ৰধাৰী চোৰাং চিকাৰীটো নিহত হয়। বৰ্তমানো চোৰাং চিকাৰীৰ দলটোৰ সন্ধানত আৰক্ষী, দণ্ডাধীশ আৰু পূৱ অসম বন্যপ্ৰাণী বিভাগৰ বিভাগীয় বন অধীক্ষকৰ দলৰ সন্মিলিত অভিযান অব্যাহত আছে।
