তেলেংগানাৰ এটা ৰাসায়নিক কাৰখানাত বিস্ফোৰণ (Telengana Chemical Blast)। বিস্ফোৰণৰ প্ৰভাৱত কাৰখানাটোৰ সমগ্ৰ ছাদখন উৰি যায়। সোমবাৰে পুৱা সংঘটিত এই ঘটনাত সেই সময়ত কাৰখানাটোত কৰ্মৰত কমেও পাঁচজন শ্ৰমিকৰ মৃত্যু হোৱা বুলি জানিব পৰা গৈছে। গুৰুতৰভাৱে আহত ১৫জন লোক।
সোমবাৰে পুৱা তেলেংগানাৰ সাংগাৰেডী জিলাৰ শিল্পা তালুকৰ ৰাসায়নিক কাৰখানাৰ পৰা হঠাৎ বিস্ফোৰণৰ শব্দ শুনা যায়। স্থানীয় ৰাইজে দৌৰি গৈ প্ৰত্যক্ষ যে কাৰখানাটোৰ ছাদখন উৰি গৈ ১০০ মিটাৰমান দূৰৈত পৰিছে। ভিতৰৰ পৰা ক’লা ধোঁৱা ওলাই আহিছিল। আতংকিত হৈ দৌৰি ওলাই আহে শ্ৰমিকসকল। লগে লগে উক্ত স্থানত উপস্থিত হয় ১১খন অগ্নিনিৰ্বাপক বাহিনীৰ বাহন।
আৰক্ষীৰ তথ্য অনুসৰি, বিস্ফোৰণৰ সময়ত কাৰখানাটোত আবদ্ধ হৈ ৫জন লোকৰ মৃত্যু হয়। এতিয়াও সন্ধানহীন হৈ আছে বহু শ্ৰমিক। সেইবাবেই হতাহতৰ সংখ্যা আৰু বৃদ্ধি পাব পাৰে বুলি আশংকা কৰা হৈছে। ১৫ জন আহত চিকিৎসালয়ত চিকিৎসাধীন হৈ আছে। অৱশ্যে বিস্ফোৰণৰ কাৰণ এতিয়াও স্পষ্ট হোৱা নাই।
ঘটনাস্থলীত উদ্ধাৰ অভিযানৰ তদাৰক কৰি আছে সংগাৰেড্ডীৰ আৰক্ষী অধীক্ষক পি প্ৰবীণ্য আৰু জিলা আৰক্ষী অধীক্ষক পৰিতোষ পংকজে। জানিব পৰা মতে, তেলেংগানাৰ এই কাৰখানাটোত আগতে ঔষধ প্ৰস্তুত কৰা হৈছিল।
