শেহতীয়াকৈ ত্ৰিপুৰাত সংঘটিত হৈছে এক চাঞ্চল্যকৰ ঘটনা (Tripura Viral Video)। এই ঘটনা সংঘটিত হৈছে ত্ৰিপুৰাৰ ধলাই জিলাত। জানিব পৰা মতে, কামালপুৰ চৰকাৰী ডিগ্ৰী মহাবিদ্যালয়ৰ এগৰাকী সহকাৰী অধ্যাপকক সাময়িকভাৱে নিলম্বন কৰা হৈছে। ছচিয়েল মিডিয়াত ভাইৰেল হৈছে অধ্যাপকগৰাকীৰ এটা ভিডিঅ’।
ভিডিঅ’টো ছ’চিয়েল মিডিয়াত পোষ্ট হোৱাৰ লগে লগে ভাইৰেল হৈ পৰে। এই ভাইৰেল ভিডিঅ’টোত অভিযুক্ত অধ্যাপকগৰাকীয়ে কলেজৰ পৰীক্ষাগাৰৰ ভিতৰত এগৰাকী ছাত্ৰীৰ সৈতে অন্তৰংগ সম্পৰ্ক স্থাপন কৰা দেখা গৈছে। এই ঘটনাক লৈ ত্ৰিপুৰাৰ জনসাধাৰণৰ মাজত বিৰূপ প্ৰতিক্ৰিয়াৰ সৃষ্টি হৈছে।
সংবাদ মাধ্যমৰ সূত্ৰ অনুসৰি, এই ঘটনাৰ পিছত সমগ্ৰ ৰাজ্যতে ব্যাপক ক্ষোভৰ সৃষ্টি হৈছে। প্ৰাথমিক তথ্য অনুসৰি, এই ঘটনা পোহৰলৈ অহাৰ পিছতে মহাবিদ্যালয় কৰ্তৃপক্ষই বিষয়টোৰ আভ্যন্তৰীণ তদন্ত আৰম্ভ কৰিছে।
অভিযুক্ত অধ্যাপকজনৰ নাম ডাঃ শান্তনু মজুমদাৰ। তেওঁ ত্ৰিপুৰাৰ বাসিন্দা। কামালপুৰ চৰকাৰী ডিগ্ৰী মহাবিদ্যালয়ৰ ৰসায়ন বিজ্ঞানৰ শিক্ষক তেওঁ। খবৰ অনুসৰি, ভিডিঅ’টোত অধ্যাপকগৰাকীয়ে নিজৰ কলেজৰ লেবৰেটৰীৰ ভিতৰত এগৰাকী ছাত্ৰীৰ সৈতে অন্তৰংগ সম্পৰ্কত থকা দেখা গৈছে।
কৰ্তৃপক্ষই কয় যে কলেজ চৌহদত এনে আচৰণ অত্যন্ত অশালীন আৰু নৈতিকতাৰ বিৰোধী। সূত্ৰটোৱে লগতে জনোৱা মতে, ত্ৰিপুৰাৰ শিক্ষা বিভাগে জাৰি কৰা চৰকাৰী আদেশত কোৱা হৈছে যে অধ্যাপকগৰাকীয়ে নিজেই স্বীকাৰ কৰিছে যে এনে আচৰণ কৰাটো ‘অতি ভুল’।
শিক্ষা বিভাগে কয় যে এনে অশ্লীল আচৰণে মহাবিদ্যালয় চৌহদত শিক্ষানুষ্ঠানৰ পবিত্ৰতা, মৰ্যাদা আৰু অনুশাসনক খৰ্ব কৰিছে। একে সময়তে ই শিক্ষক বৃত্তিকো দুৰ্নীতিগ্ৰস্ত কৰিছে।
সংবাদ মাধ্যমৰ সূত্ৰ অনুসৰি, এই নিৰ্দেশ জাৰি কৰিছে উচ্চ শিক্ষা বিভাগৰ বিশেষ সম্পাদক ৰাভাল এইচ কুমাৰে।
এই আদেশত কোৱা হৈছে যে ভাইৰেল ভিডিঅ’ আৰু মহাবিদ্যালয়খনৰ আভ্যন্তৰীণ অনুশাসন সমিতিৰ প্ৰাৰম্ভিক তদন্তৰ ভিত্তিত ৰাজ্য চৰকাৰে এই সিদ্ধান্ত গ্ৰহণ কৰিছে। ইয়াৰ ভিত্তিত মহাবিদ্যালয়ৰ অধ্যক্ষৰ জৰিয়তে সংশ্লিষ্ট প্ৰতিবেদন বিভাগলৈ প্ৰেৰণ কৰা হয়।
অনুশাসনমূলক ব্যৱস্থা হিচাপে মহাবিদ্যালয়ৰ পৰা সাময়িকভাৱে নিলম্বন কৰা হৈছে ডঃ শান্তনু মজুমদাৰক। নিলম্বনৰ সময়ত তেওঁক দক্ষিণ ত্ৰিপুৰাৰ বেলোনিয়াৰ ঈশ্বৰ চন্দ্ৰ বিদ্যাসাগৰ মহাবিদ্যালয়ত থাকিবলৈ নিৰ্দেশ দিয়া হৈছে। লগতে জানিব পৰা মতে, তেওঁৰ ওপৰত আন এক নিষেধাজ্ঞা আৰোপ কৰা হৈছে।
শিক্ষা বিভাগৰ পূৰ্বৰ অনুমতি অবিহনে অভিযুক্ত অধ্যাপকজনে বেলোনিয়া এৰি যাব নোৱাৰিব। এই ঘটনাক লৈ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছে। শিক্ষকতাৰ দৰে দায়িত্বশীল বৃত্তিত এজন অধ্যাপকৰ এনে আচৰণে সমাজত গভীৰ প্ৰশ্ন উত্থাপন কৰিছে।
